Shillong, Risaw 06
Hadien ka jingbuddien ka Sorkar Jylla bad ka Sorkar Pdeng, ka Jylla mynta ka la ïoh jingmynjur na ka Sorkar Pdeng ban kyntiew noh sha ka main anganwadi centre ïa ki 1,266 tylli ki mini anganwadi centre.
Kane ka la urlong hadien ka jingïakynduh bad pynsngew jong u Myntri ka tnat Social Welfare u Bah Paul Lyngdoh ha ka Myntri ka Sorkar Pdeng ka Smriti Zubin Irani dang shen ha New Delhi ha kaba la pynsngew ruh ïa ki shnong kiba khlem pat don ïa ka Anganwadi Centre.
U la ong ba ha kine ki 1,266 tylli ki Centre kiba la kyntiew sha ka main anganwadi centre, yn hap thung briew shuh iwei i nongtrei bad nongïarap ha kaba ka jingsiew la pynkiew sha ka T.4,500 shibnai bad kiba shah thung thymmai kin ïoh T.2,250.
Ka jinglut na ka bynta kane ka long T.826.38 lak ha kaba ka Sorkar Pdeng ka bei 90 na ka 100 bad ka Jylla ka bei tang 10 na ka 100. La mynjur ruh ban thung 51 ngut ki supervisor.
“Ngi la ïoh ruh ki centre kiba thymmai 266 tylli kiba yn sdang noh ha Jylla ha kaba yn thung ruh 266 ki nongtrei bad 266 ngut ki nongïarap,” u la ïathuh.
La bthah ruh ïa ka Sorkar Jylla ban thung bad ai jinghikai ïa kine ki nongtrei ba kin ïoh ki tiar ki tar bad ki jingdonkam baroh.
