Shillong, Risaw 06
Ka Regional Committee kaba khlieh da u Bah Paul Lyngdoh kum Myntri Sorkar kan pyndep noh hapoh mynta u Risaw ban phah kaiphod sha ka Sorkar halor u pud u sam haba ïadei bad ki jaka ha West Khasi Hills district khamtam ki jaka ha thaiñ Langpih kiba don ka jingïakajia pud bad ka Assam.
U Bah Paul u la ong ba ynda la wanphai u Myntri ka Sorkar Assam u Chandra Mohan Patowary naba leit jingleit, kan sa don ka jingpynbeit ban leit sha ki jaka ha khappud hashwa ban pynkhreh ïa ka kaiphod. U la ong ba ka thong ka long ban pyndep noh ban aiti ïa ka kaiphod hapoh une hi u bnai ba mynta (Risaw).
Haba kylli halor ka jingpynkhreh kaiphod bad rukom aiti, u la ong ba ka jingpynkhreh kai-phod kan long kaba peit lang na baroh arliang bad ka kaiphod kan long kaba kynthup lang tang kawei.
Kumta u la ong ba ynda la poi u Patowary ha Guwahati yn sa pynbeit ïa ka sngi ban leit jngoh ïa ki jaka ha khappud ka thaiñ Langpih bad hadien kata yn pynkhreh noh ïa ka kaiphod kaba yn aiti noh mynta hi u bnai Risaw sha baroh ar tylli ki Sorkar Jylla.
Hadien kane, kan don sa ka jingïakynduh biang jong ar ngut ki Myntri Rangbah jong ka Meghalaya bad Assam ban ïakren halor ki kaiphod kiba la phah da ki Regional Committee.
