Shillong, Risaw 06
Ka Khasi Students’ Union War Jaiñtia Circle (KSU) ka la lap ba ka Sohkha Government Higher Secondary School (SGHSS) kam don ïa u nonghikai ‘Chemistry’ mynta la 8 bnai kynthih.
“Hadien ka jingud jingnam jong ki khynnah skul bad ki nongshong ka thaiñ sha ka Khasi Students Union War Jaiñtia Circle (KSU), ka seng ha ka Sngi Thohdieng ha ka jingdonlang u General Secretary, samla Lurman Talang bad kiwei, lem bad ka jingsynran lang ki nongïalam na West Jaiñtia Hills District Unit ba kynthup ïa u General Secretary, samla Leningrad Tariang ki la leit ban jurip ïa katei ka skul Sorkar bad lap ba kam don ïa u nonghikai ‘Chemistry’ naduh u bnai Lber,” la ong ka kyrwoh na ka seng.
Ka seng ynda ka la tohkit bniah halor katei ka bynta, ka la shem ba katei ka dei namar ka daw jong ka jingpynkylla ka Sorkar ha kaba ki nonghikai kin hap ban pyndep ïa ka ‘B.Ed’ bad kumta u nonghikai ba dei peit ïa katei ka sobjek u la leit ban bteng ïa ka jingpule hadien katei ka jingbthah ban pyndep katkum ka kyndon ba la buh.
Hynrei kaba sngewlyngngoh ka long ba ka Sorkar kam shym lah ban bujli ïa katei ka ‘post’ wat hadien ba lah dep khot ban thep ïa katei ka kam kaba lait.
“Kaba pynsngew lyngngoh shuh-shuh ïa ka seng ka long ba naduh u bnai Lber, kane ka skul ka khlem don ïa u nonghikai ‘Chemistry’ bad ka buh jingeh haduh katta-katta ïa ki samla pule jong kane ka skul,” ong ka seng.
Ka seng ka dap da ki jingsngew bitar halor katei ka jingjia kaba buh jingeh ïa ki samla pule kiba thrang ban poi shakhmat ha ki liang baroh khamtam ba la jan sa ka ‘Pre-Selection’ bad ka ‘Selection’ kumjuh ban pynkhreh ïa kiwei pat ki eksamin.
Na ka liang ka KSU kan ïai buddien ïa katei ka kam bad lada ka Sorkar kam lah ban pyndep ïa la ka kamram, ka seng ka la kren shai ba lada ki khynnah pule katei ka skul kim lah ban ïoh ïa ka jinghikai kaba biang kumno ka Sorkar kan pyrkhat na bynta jong ki.
“Ka Sorkar ka dei ban shim ïa ka jingkitkhlieh bad ruh ban wad ki lad ki lynti khnang ba kitei ki samla pule kin ïoh ïa ka jinghikai kaba tikna shuwa ba kin pynkhreh ïalade ban thoh ïa ki eksamin jong ki,” la pynkut ka kyrwoh na ka seng.
