Shillong, Risaw 06
Ha ka 5 tarik Risaw, la ïoh pdiang ïa ka ejahar ha Cantonment Beat House ba ha ka 4 tarik Risaw ha ka por kumba 9:20 baje mynmiet, u Lakhan Singh, u nongïalehkai kriket ‘Ranji’ u la shah shoh ha ka kynhun ki runar hajan Anjalee Cinema Hall.
U Singh u la shah shoh katba u dang leit phai sha Jhalupara hadien ba kawei ka kali ka la tam ïa ka ‘scooty’ (jong u) bad phah sangeh ïa u.
Hadien katei, katto-katne ngut ki runar ki la mih na ka kali bad sdang ban shoh ïa u ha kaba u la mynsaw malu-mala ha ki bynta jong ka durkhmat.
Haba ïadei bad katei ka jingjia, la pynngat mukotduma ha Sadar PS (Case No. 274(10)2023 u/s 325/341/506/34 IPC) bad la kem noh ïa uwei uba donkti ha katei ka kam ha ka 5 tarik Risaw.
Ïa utei uba shah kem la rah noh sha ïingbishar hadien ka jingtohkit ki pulit.
Ha kajuh ka por, ki pulit ki dang ïaid shakhmat ban kem shuh ïa kiwei pat kiba don bynta ha katei ka kam. Kane ka long katkum ka kyrwoh na u Superintendent of Police (City), East Khasi Hills, Shillong, Bah Vivek Syiem, IPS.
