Shillong, Risaw 06
U Rangbah Kur Sohphoh, Bah Poland Sohphoh u la ïathuh haba ki bahaïing ki la leit phah duwai kiba sah sha Bhoi ki la batai ha ka sien kaba nyngkong ba u Bah Justin Sohphoh un sa wanphai ïing biang hadien ba u la jah na Tura, West Garo Hills District ryngkat bad ka kali ba u ñiah.
U Bah Poland u la ïathuh biang ba ha ka jingleit kaba ar sien, u nongduwai u la batai ba u Bah Justin u dang ïaid wir bad hangne ka la pynkulmar shuh shuh ïa ki bahaïing.
Kum ban shu pynkynmaw, u Bah Justin Sohphoh, 54 snem ka rta bad uba dei u nongñiah kali jong ka shlem treikam Meghalaya Public Service Commission, Shillong u la leit sha Tura, ha ka 5 tarik Nailur, 2023 ban ïakynduh ïa ka lok. Katba ha ka janmiet jong ka 16 tarik mynta u bnai u la mih na ïing ban leit theh umphniang kali ha Tura bad naduh kata u khlem wanphai ïing shuh.
U Bah Poland u la ïathuh ba u don uwei u pulit na ka jait Sohphoh u la trei shitom bha ban leit ïakynduh ïa ki pulit ha ki thanat ha Assam, hynrei haduh mynta ym shym la ïoh jingtip shuh.
Kumta u don jingkyrmen ba un sa wanphai namar u Bah Justin u dei u briew uba satar namar don ki por ba u thiah hapoh kali baroh shi taïew ha kiwei ki jaka ha Assam ha ka por ba u wanphai na Tura sha Shillong.
