Nongstoiñ, Risaw 08
Ka shnong Mawsiangbah, West Khasi Hills ka la ïai bteng ban wad ïa u rangbah uba la jah rngai bad khlem wan phai ïing shuh hadien ba u la leit wad dieng kseh ban thang.
Lah ban kdew hangne ba ïa utei u rangbah uba la jah la tip kyrteng kum u Lostar Nongphud (40 snem ka rta) bad u la jah bad khlem wan phai ïing shuh naduh ka 4 tarik mynta u bnai hadien ba u la leit sha khlaw ban leit wad dieng kseh ban thang.
Ki nongkitkam ka shnong Mawsiangbah, ki la pyntip biang ba ka jingwad da ka shnong ïa utei u rangbah mynta ka la jam 3 sngi lynter hynrei haduh ka Sngi U Blei ym pat shym la lap satia ïa u.
Shuh shuh ki la ïathuh ba ka jingwad ïa utei u rangbah kan ïai bteng ha ka Lah Sngi U Blei, ha kaba nalor ka shnong Mawsiangbah la ong ba kiwei-kiwei ki shnong ba marjan ruh ki la pynpaw ka jinglong la kloi ban wan ïatreilang ban wad ïa utei u rangbah.
