Shillong, Risaw 08
Saw tylli ki projek pynmih bording kynthup ka Kynshi projek ki don ha ka thup ban pyndonkam da ki buit katkum ka jingstad mynta na ka bynta ban tan um ban pynmih bording ilektrik lane Pump Storage Project (PSP) ha kaba ka National Hydroelectric Power Corporation (NHPC) ruh ka dang thawlad kumno ban ïoh kum kine ki projek khnang ban lah pynmih bording palat 20,000 mega watt ha ka ri.
Ka tyllong khubor ka ïathuh ba ka Meghalaya ka la don lypa kumba 4 tylli ki projek kiba lah ban leh da ka pump storage. Ha kum kine ki projek donkam ban don ar tylli ki jaka pyllang um ha kaba kawei ka dei ban pyllang um na ka bynta ban pyllait ïa ka um ban pynmih bording ha ka por ba duna um.
La ong ba ka Kynshi projek ka dei kawei na ki projek kaba lah ban pyndonkam da kane ka buit bad shen ka Sorkar Jylla kan pynbit pynbiang kumno ban pynïaid sha-khmat ïa kum kine ki projek.
Kine ki projek ki donkam ïa ki kor ki bor bad jingstad ka juk mynta kumno ban pyllang um ha ka por ba jur slap bad ïa kata kajuh ka um kaba pyllang yn sa lah ban pyndonkam ha ka por ba ka pung kaba den ka la duna um.
Dang shen na ka liang u Myntri ka tnat bording, u AT Mondal ruh u la pynsngew hakhmat u Myntri ka tnat ka bording ka Sorkar Pdeng u RK Singh haba ïadei bad ka PSP.
U Mondal u la ong ba ki don 4 tylli ki projek ha Jylla bad kine ki don bha ka lad ban pynmih bording haduh 3,100 mega watt da kaba pyntreikam ïa ka pump storage, hynrei kaba donkam ka dei tang ka pisa ban leh ïa kane.
Kumta u Mondal u la kyrpad ïa u Myntri ka Sorkar Pdeng ban phaikhmat lem ban kyrshan ïa ka Meghalaya namarba kane ka lad ka dei kaba biang tam kum ka lad ban pynduna ïa ka jingkyrduh bording ha kane ka Jylla.
La ong ba ki don ki projek bording kiba la treikam lypa kiba lah ban leh ïa ka pump storage khnang ban pyllang um lypa ban ïoh pyndonkam ïa ka um ha ki bnai bym hap slap.
