Shillong, Risaw 08
U President ka UDP East Khasi Hills District, Bah Titosstarwell Chyne uba dei ruh u MDC ka Sohra konstitwensi, u la pyntip ba la bthah ïa baroh shiphew tylli ki jylli (circle) ka UDP ba kin pynpoi noh ïa ki kyrteng jong ki kyrtong kiba pan tiket na bynta ka ilekshon MDC ha u snem 2024.
U Bah Chyne u la pyntip ba kin pynpoi noh ïa ki kyrteng jong ki kyrtong hapoh mynta u bnai (Risaw) khnang ban ïoh bishar bniah shwa ban phah sha ka State Election Committee jong ka UDP.
Nalor kane, u la ïathuh ba ha kito ki konstitwensi kiba la don lypa ki MLA kum ha Maw-synram, Sohïong bad Mawphlang la aiti ha ki ba kin jied hi bad sa phah ïa ki kyrteng sha ka Dis-trict Election Commi-ttee.
Katba ïa ki MDC kiba la don lypa kim donkam shuh ban wad kyrtong, hynrei ki la dei lypa ki kyrtong ban ïa-khun ïa ka ilekshon MDC la shem snem kum ha Sohra, Shella, Lyng-kyrdem bad Nongkrem.
Shuh shuh u la pyntip ba kito ki konstitwensi ki bym don MLA bad MDC la bthah ïa ki President ba kin khot noh ïa ka jingïalang ba kin wad kyrtong khnang ban pynthikna ba ka UDP kan pynïeng kyrtong baroh shiphew tylli ki konstitwensi ha ka ilekshon MDC 2024.
Ka UDP kaba dei ka seng riewlum kan hap ban ïakhun pyrshah ïa ka NPP kaba dei ka seng kaba ïatreilang ha ka sorkar jylla. Nangta ka seng riewlum ba dang thymmai kum ka VPP kaba ki paidbah ki dang sngewtynnad haduh mynta ïa ka jingrwai ha u Prah, bud sa ka seng Congress kaba ki paidbah ki dang shaniah hapoh ka jylla hadien ba ki paidbah ki la jied san ngut ki MLA ha kane ka ilekshon ba dang shu dep.
