Gaza Strip, Risaw 08 (UNI)
Ki shipai ka Israel Defense Forces (IDF) ki la ïoh ban pynïap palat 400 ngut ki dkhot ka Hamas ha Gaza Strip bad ka la ïoh ruh ban kem bun ngut kiwei pat naduh ba ka jingïakhun hapdeng ka Palestine-Israel ka la sdang ha ka Sngi Saitjaiñ, la ong u nongaiktien ka IDF, u Daniel Hagari, ha ka Sngi U Blei.
“Ngi la ïoh ban pynïap palat 400 ngut ki lehnoh hapoh Gaza, bad ki la don bun ngut ruh kiba la shah kem,” la ong u Hagari katkum ka lad pathai khubor “i24 broadcaster”.
Ka Israel ka la shah thombor da ki ‘nam ding na ka thaiñ Gaza Strip ha ka Sngi Saitjaiñ bad ki la don bun ngut ki lehnoh Hamas kiba la ïoh ban rung tuh sha Israel na ki thaiñ Shathie. Ki shipai Israel ki la ïathuh ba ki lehnoh Hamas ki la siat palat 3,000 tylli ki ‘nam ding.
Ka sorkar Israel ka la phah ïa ki shipai jong ka sha ki thaiñ Shathie ban ïoh knieh biang ïa ki jaka na ki lehnoh Hamas, bad ki la thombor ruh ïa ki jaka ka Hamas ha Gaza.
