Shillong, Risaw 08
Hapoh ka jingïalam jong u Myntri Rangbahduh, u Narendra Modi bad ka jingpeit jong u Myntri Kam Pohïing bad Cooperation jong ka Sorkar Pdeng, u Amit Shah, ka Sorkar India ka la shim bun ki sienjam ban pynkhlaiñ ïa baroh ki cooperative society ha ka ri. Ha kaba ïadei bad kane, u Myntri ba dei khmih ïa ka Tnat Kam Pohïing bad Coopera-tion jong ka Sorkar Pdeng, u Amit Shah u la shim ïa ka rai kaba kongsan ban pyndonkam ïa ki kor kompiwtor bad pynkup bor ïa ki registrar jong baroh 28 tylli ki jylla bad 8 tylli ki union territory, bad 1,851 tylli ki Agriculture and Rural Development Banks (ARDB) kiba treikam ha 13 tylli ki jylla.
Ha kaba ïadei bad ka skhim pyndonkam ïa ki kor kompiwtor ha baroh ki Primary Agriculture Credit Societies (PACS) ha ka ri, la mynjur ïa ka skhim kaba bei tyngka da ka sorkar pdeng ban pyndonkam ïa ki kor kompiwtor ha 1,851 tylli ki shnat jong ki Agriculture and Rural Development Banks (ARDB) ha 13 tylli ki jylla lyngba ka national unified software bad ka jingpyndonkam ïa ki kor kompiwtor ha ki shlem treikam Registrar of Cooperative jong baroh ki Jylla/ Union Territory kumba leh ha ka Central Registrar.
Haba ïadei bad kane ka skhim yn plie ïa ka Project Monitoring Unit (PMU) jong ka sorkar pdeng ka ban trei na ka bynta ka jingpyntreikam pura ïa ka jingthmu bad ka jinglut na ka bynta kane ka skhim kan long T. 225.09 klur.
Ka jingpyntreikam ïa kane ka skhim yn tang ba kan ïarap ïa ki briew ban ïoh kloi ïa ki jingshakri ba ai da ki Tnat Cooperative jong ki jylla bad ki shlem treikam jong ki Agriculture and Rural Development Banks (ARDB), hynrei kan wanrah shuh shuh ka jingshai bad ka jingryntih ha ka jingpyntreikam ïa kine ki shlem treikam ka ban kham pynseisoh ïa ki kam ba ki trei bad pyllait na ka jingsepei ka por.
