Jerusalem, Risaw 08 (UNI)
Ka jingïap briew ha Israel ka la kot sha palat 600 ngut naduh ba ka jinghiar thma jong ka kynhun pyntriem Hamas na Palestine ka la sdang ha ka Sngi Saitjaiñ. Ïa kane la pyntip da ka lad pathai khubor na Israel ïa kaba la tip kum ka Kan TV News.
Haba pyntip ba kitei ki jingkheiñ ki la wan na ki bor sorkar, ka Kan TV ka la ong ba kane ka jingïap briew ba palat 600 ngut ka dei kawei na kiba heh tam ha ka khana-pateng (history) jong ka Israel.
Na ka liang ka tnat ka koit ka khiah jong ka Israel ha ka Sngi U Blei ka la pyntip ba kumba 2,048 ngut ki briew ki la mynsaw bad napdeng kine, 20 ngut ki don hapdeng ka jingshitom kaba jur.
Ha kane ka sngi, na ka liang ka Security Cabinet jong ka Israel ka la pynbna ïar ba ka Israel ka don hapdeng ka thma, bad ka la ong ruh ba kan pynlong da ka jingïakhun da ki shipai ha Gaza ha ki sngi ki ban wan.
Ha kawei pat ka liang, ki la don kumba 413 ngut ki briew kiba la ïap ha Gaza hadien ba ka Israel ka la thombor kum ka nongkylliang jong ka jingwan thombor ki dkhot ka Hamas ïa ka Israel. Nalorkata, ki la don ruh sa kumba 2,300 ngut kiba la mynsaw.
Hynnin ka miet, ka jingïakhun hapdeng ki shipai Israel bad ki lehnoh Hamas ka la don ha kumba 22 tylli ki jaka ha Israel.
Ki shipai Israel ki la ong ba ki lehnoh Hamas ki la rung jubor sha ki ïing sah jong ki briew bad kane ka la wanrah ïa ka jingduh noh jong ki mynsiem. Palat 1,000 ngut ki nong Israel ki la mynsaw na ka jingshah siat kuli bad kumjuh ruh na ka jingther ‘nam ding ki lehnoh Hamas.
