Shillong, Risaw 08
U ophisar ba la shongthait na Khasi Hills Autonomous District Council (KHADC) Bah Poland Sohphoh u la rai ban pan tiket na ka seng UDP na Mawkyrwat konstitwensi na ka bynta ka ilekshon MDC ka ban long la shem snem.
Haba ïakren bad u Bah Poland u la ïathuh hadien ba u la kyrshan ïa u Bah Renikton Lyngdoh uba la ïoh jingjop ha ka ilekshon MLA ba dang shu dep u don jingkyrmen ba ki nongkyrshan ka UDP kin jied ïa ka kyrteng jong u na ka bynta ban ïakhun ïa ka ilekshon MDC 2024.
Nalor kane, u la ïathuh hadien ba la shongthait na ka kam kum u ophisar ka KHADC ha u snem 2017, ha u Kyllalyngkot 2018 u la ïakhun ïa ka ilekshon MLA na Mawkyrwat konstitwensi na ka tiket BJP hynrei ki paidbah ki la bun kiba ai jingkyrshan ïa u.
Shuh shuh u la ïathuh hadien ba u la sngewthuh ïa la ka jong ka bor u khlem ïakhun shuh ïa ka ilekshon MDC. Ha u snem 2019 u la leit ban kyrshan noh ïa u Bah Carnes Sohshang uba la ïoh jingjop ha ka ilekshon MDC.
“Haba ka jingïadei paralok kam shym ïahap shuh bad u Bah Carnes nga la leit kyrshan ïa u Bah Renikton ha ka ilekshon MLA kaba ngi la ïoh ïa ka jingjop”u la ong. U la ïathuh ba ka jingkwah ka jong u ban ïakhun ïa ka ilekshon MDC ka dei namar u kwah ban pynjanai biang ïa ka KHADC hadien ba u la shongthait na ka kam kum u ophisar.
Namar kata, u don jingkyrmen ba un ïoh ïa ka tiket UDP namar haduh mynta ki paidbah ki dang shaniah ïa u lada ym don ba pan tiket.
