Nongstoiñ, Risaw 08
Ka Federation of All School Teachers of Meghalaya (FASTOM ) ka kynhun ki nonghikai skul ‘Adhoc’ ha ka Sngi Saitjaiñ ka la shim ïa ka rai ban ai por haduh ka 30 tarik Ïaïong, 2024 ïa ka Sorkar Jylla ba kan pynurlong noh ïa ki jingdawa ban kyntiew kyrdan ‘Deficit’ noh ïa baroh ki skul ‘Adhoc’ kynthup naduh ki nonghikai ha ki LP, Secondary bad Higher Secondary, kumjuh ban pynurlong ïa ka 5% ‘Annual Increment’ bad ban kyntiew ïa ka ‘Cess Tax’ na ka 3% sha ka 10%.
Ka kynhun ka la dawa ruh ban siew tulop tikna man la u bnai da kaba pynrung ruh sha ki ‘bank account’ jong ki nonghikai khnang ban lait na ka jingpynslem ïa ka tulop bad ruh ban lait na ka jingshah khate pisa khlem jingtip jong ki nonghikai, ban pynjlan ïa ka rta shongthait na ka 60 sha ka 65 bad ban ym don jingkhang ïa ka snem ki nonghikai ‘Adhoc’ lada ki thep kam Sorkar.
Ïa kane ka rai la shim ha ka jingïalang paidbah lane ka ‘General Meeting jong ka FASTOM kaba la long ha Madan New Nongstoiñ, West Khasi Hills da ka jingwan ïashim bynta jong ki nonghikai kiba hap hapoh ka lama jong ka FASTOM na kylleng ki jaka jong ka Jylla.
Ka FASTOM ka la shim ruh ïa ka rai ba lada ka Sorkar kan ïai sngap mynthi ban pynurlong noh ïa ki jingdawa haduh ka por lym kumta kan bteng biang ban pynlong ïa ki jingïakhih kiba tyngeh .
Ha katei ka sngi, na ka liang ka FASTOM, West Khasi Hills District ka la ïoh ruh ban pynkup burom ïa ki nongkitkam bathymmai jong ka FASTOM na bynta ka samoi treikam 2023-2026 ha kaba u General Secretary FASTOM – Garo Region, u Elvis R. Marak u la shim ïa ka bynta ban pynkup burom.
U Bah Diningroy Marweiñ, President ka FASTOM haba kren ha katei ka jingïalang u la ong ka jingseng ïa ki skul naduh ki L.P. haduh Higher Secondary ka la ïai bteng lyngba ka jingpynshlur bad kular jong ka Sorkar lyngba ka tnad pule-puthi ban ïarap halor ka jingsiew tulop bad ban ïarap ruh ban kyntiew ïa ki skul sha ki skul ‘Deficit’ hynrei kaba sngewsih ka long ba mynta la kumba 20 snem ka Sorkar kam pat lah ban pynurlong haduh kine ki sngi.
“Ngi sngewnguh ïa ka Sorkar MDA-1 kaba la pyrshang ban ïarap kyntiew ïa ki nonghikai ‘Adhoc’ bad ngi la ai por ruh ïa ka Sorkar ba kan shim rai ha kaba ïadei ban kyntiew noh ïa ki nonghikai ‘Adhoc’ kum ki ‘Deficit’ hynrei sngewsih bad sniewbok na ka jingwan ka ilekshon kitei ki jingangnud jong ki, ki la shu sahkut biang haduh mynta,” ong u Bah Diningroy.
U la ong ruh ba mar ïa thaw ka Sorkar MDA-2 ki la leit mih man ka por bad ai ruh ïa ki dorkhas halor kitei ki mat jingdawa jong ki bad u la ong ba ka la dei ka por ba ka Sorkar MDA-2 mynta ka kynti kan shimkhia ban pynurlong noh ïa kitei ki jingdawa hapoh mynta hi u snem.
“Ngi kyrpad ïa ka Sorkar Jylla ba kan sngewthuh bad pyrkhat lem ïa ka jingeh jong ngi, ngi dei hok ki nonghikai bad ngi dei hok ruh ki nongshong shnong jong kane ka Jylla. Ngi kyrmen ba ka Sorkar MDA-2 kan shimkhia lem na ka bynta jong ngi hapoh ka por kaba lyngkot,” u la ong.
U la ong ruh ba ki nonghikai kiba dei na ki jaka sor bad ki khap sor ki la ud ba kim shym la lah siew bad pynbiang ïa ki jingdonkam ha ïing kumjuh ki nonghikai ha nongkyndong ki la ud ba kim shym la sngew ïoh lad shuh wat ban shna pynbha ïa ki ïing ki sem ba la rim ba la jot ruh kumjuh ruh lada ki pang ki bahaïing ha sem ki shem jynjar shibun ban leit sha ki jaka sumar ba bha.
U la pynkynmaw ba ka FASTOM ka la ïakynduh arsien ïa u Myntri ka tand pule puthi, lai sien ïa u Advisor ba donburom ka tnad pule puthi bad la ïakynduh ruh bunsien ïa ki ohpisar bapher-bapher jong ka tnad peit ïa ka pule-puthi.
“Ngi la donkam noh mynta ban tip ïa ka por ba ka Sorkar kan buh bad lymda ka Sorkar kan buh noh ïa kata ka por ba lano kan pyndep ïa la ka kular ngi kum ka FASTOM ngin ym sangeh ban ïa ieng tylli ban dawa ïa kaei ba ngi dei ban ïoh,” u la ong.
Shuh shuh u la pynpaw ruh da kaba ong, “Mynta ngi lah pynbiang ban ai ka jingnang jingstad kaba pura ïa ki khynnah skul hynrei ïa la ki khun pat ngim lah ban pynbiang bad ngi da sngewsih shibun eh.”
