Shillong, Risaw 08
Ka tnad shipai liengsuiñ – Indian Air Force (IAF) ha ka Sngi U Blei ka la rakhe ïa ka jingdap 91 snem jong ka tnad.
Ka IAF kaba la sdang ïa ka jingtreikam jong ka ha ka 8 tarik Risaw, 1932 ha ryngkat 6 tylli ki ‘Indian Hawai Sepoy’, mynta ka la nang kiew ban long kum kawei na ki tnad shipai liengsuiñ kaba khlaiñ tam ha kylleng ka pyrthei.
Kum shi bynta jong ka jingrakhe ïa ka ‘Air Force Day’, ki shipai ka tnad IAF ki la pynsngew biang ïa ka jingbam smai ban shakri ïa ka ri ha ryngkat ka mynsiem ieid ri bad ka jingtbit ha ka kam da kaba bud ryntih ïa ki nongrim jong ka tnad.
Haba ïadei bad ka ‘Air Force Day’, baroh ki shnat hapoh ka Eastern Air Command ki la rakhe ïa ka jingdap 91 snem jong ka IAF da kaba pynlong ïa ki prokram bapher-bapher.
Haba kynmaw ïa baroh ki ‘riewshlur kiba la aiti la ka jong ka jingim ha ka jingshakri ïa ka kam, u Air Marshal S.P. Dharkar, Air Officer Commanding-in-Chief, Eastern Air Command u la leh burom da kaba buh ïa u syntiew ha War Memorial kaba ha Head Quarter, EAC, Shillong .
Shuh shuh u la phah ruh ïa ka kyrwoh jingaikhublei sha baroh ki shipai bad ki bahaïing hasem jong ka Eastern Air Command bad ban jur ba kin ïai bteng ban trei minot ha ka ban kyntiew ïa ka IAF bad ka ri sha ki kyrdan ba shajrong jong ka nam. Kane ka long katkum ka kyrwoh na u PRO Defence, Meghalaya, Mizoram bad Tripura, Wing Commander, Sreeprakash J.
