Jowai, Risaw 08
Ka jingjur slap kaba la neh la katto-katne sngi ha Ri-Lum Jaiñtia ka la ïalam pynban sha ka jingïam briew na bynta kawei ka longïing ha kaba saw ngut na ki dkhot jong ka ki la duh ei noh la ka jingim hadien ba ki la shah tep im ha ka khyndew kaba la twa halor ka ïing jong ki katba ki dang ïohthiah lyngngai.
Katei ka jingjia kaba sngewsih ka la jia ha ka shnong Pynthorlangteiñ kaba hap hapoh ka Jowai Police Station, West Jaiñtia Hills District ha ka por mynstep jong ka Sngi U Blei.
Ki dkhot jong katei ka longïing ki kynthup ïa kitei saw ngut bad baroh ki la khlad noh na jingban jong ka khyndew kaba la twa halor jong ki.
Kitei saw ngut ki long u kpa ka ïing, u Bah Biangki Phawa (31snem ka rta) bad ka kurim jong u, ka Kong Pynjanai Ryngkhlem (25 snem ka rta) lem bad 2 ngut ki khun kiba dangrit kiba kynthup ïa u Edify Ryngkhlem (6 snem ka rta) bad ka Wiladaroi Ryngkhlem ba dang 3 snem ka rta.
Ha ka jingïakren bad u Waheh Shnong, u Bah A. Lipon, u la ong ba ha ka por ba jia katei ka jingtwa khyndew, ym shym la don mano-mano ba ïohi, hynrei dei tat ynda haba ki briew ki ïa khie thiah ki la ïohi ïa kaei kaba la jia ha ka por 5.30 baje eiei mynstep.
Ki para shnong kiba la ïohi ïa katei ka jingjia mar-mar ki la pyrshang kat lah kat ïai ban ai jingïarap da kaba tih bad pynkhuid ïa ka khyndew hynrei ka khyndew kaba la twa ka la ïoh ban rung shapoh ka ïing, ha kawei ka liang kaba la ïalam sha katei ka jingjia ba sngewsih.
Ha kaba ïadei bad katei ka jingjia, ka Sorkar Jylla ka la bthah ïa u Deputy Commissioner ka West Jaiñtia Hills District ba un ai ïa ka jingïarap kaba long T. 16 lak, kata ka mar T.4 lak sha ki bahaïing hasem jong kitei ki saw ngut ki lanot.
Na ka liang ka Dorbar Shnong Pynthorlangteiñ bad ka Balang Presbyterian Pynthorlangteiñ kin sa peit ïa baroh ki jingdonkam bad ki jingpynbit pynbiang na bynta ka jingleh burom ba khatduh ha u lum jingtep ka Balang ha ka 9 tarik mynta u bnai.
Kumba ka long, la pyllait noh ban leh ïa ka ‘Post Mortem’ kumba la kyrpad na ki bahaïing jong baroh arliang.
