Shillong, Risaw 09
Ka Fashion Society Shillong ka la pyntip ba kan pynlong ïa ka jingïakob ‘thei bhabriew ne ka Miss Shillong 2023 ha ka 14 tarik mynta u bnai ha Soso Tham Auditorium, Shillong.
Ha kane ka jingïakob ‘thei bhabriew kaba long ruh kum shi bynta na ka jingrakhe dap 40 snem, ka Fashion Society ha ka sien kaba nyngkong kan pynlong ruh ïa ka Ms Supermon Beauty Pageant.
Ha ka kyrwoh ba la pyllait da u Secretary, Public Relation ka FSS u Bah R.L Sohlya u la pyntip ba ka Society ka la dep pynlong ïa ka Audition mynta la ar bnai tam bad ïa kito kiba la jied ban ïakhun, la dep ban ai ruh ka jinghikai ha kaba ïadei bad ka rukom kren, rukom ïaid ‘Catwalk’ bad ban tei ïa la ka longrynïeng.
La ïathuh ba katei ka jingïakob kan sdang da ka jingpyni ïa ka riam tynrai ka ban pynbud sa ka jingshad ba la pynwandur da ka Ribha War Lyngkhoi bad ïa ka Grand Finale la pynwandur da u Chris Kurbah bad ka Naphisa Pala.
Shuh shuh ka Society kan pynlong ruh ïa ka Ms Supermom Beauty Pageant, ka jingïakob na ka bynta ki ‘Single Mother’ ne ki longkmie kiba kyrshan marwei ïa ka ïing. Kane ka rynsan kan pynkup burom ïa ki ba kin lah ban pynurlong ïa ka jingphohsniew bad ka jingangnud ka jong ki bad ban sdang biang ïa ka jingim kaba thymmai.
Ki khusnam kiba la pynkhreh na ka bynta ki nongjop ïa ka nam Miss Shillong, kata ba nyngkong kan long T.1 lak, ba-ar T.75,000 bad ba lai T.50,000. Katba ki nongjop ha ka Ms. Supermom, ba nyngkong kan long T.50,000, ba-ar T.30,000 bad ba-lai T.20,000.
Ki khusnam shimet ba la pynkhreh pat ki long ka Miss Beautiful Eyes, Miss Beautiful Skin, Miss Beautiful Hair, Miss Beautiful Smile bad Miss Catwalk ha kaba ki nongjop kin ïoh mar T.5,000.
Ha katei ka sngi, ka FSS kan pyni ruh ïa ka sap tem jong ka Liza Lyngdoh, kaba tbit ban tem ïa ka Guitar, kaba dei na ka shnong Mawkyrwat bad mynta ka Liza ka ai jinghikai tem ha Bangalore.
