Shillong, Risaw 09
Ki don haduh 269 tylli ki skul hapoh ka jylla Meghalaya kiba don ïa ki khynnah skul kiba long tang hapoh 10 ngut bad kane ka long katkum ka jingkheiñ ne ka jingpyntip ba la ai da ka tnat Ministry of Education ka Sorkar Kmie.
La pyntip ba napdeng ki 269 tylli ki skul kiba don tang hapoh 10 ngut ki khynnah skul, 169 tylli ki dei na Lower Primary bad 101 tylli na Upper Primary.
Ïa kane la pyntip da u Myntri ba khmih ïa ka tnat pule- dangle ka Jylla u Rakkam A Sangma haba kren sha ki lad pathai khubor ha kaba u la pynpaw ba kum ka sorkar ka sngewdiaw bha halor kane ka jingduna ka jingpynrung kyrteng ki khynnah hapoh ki skul Lower Primary bad ha ki Upper Primary jong ka jylla.
Na ka liang jong u Rakkam u la ong, “Kane ka jingkheiñ ka dei ba la ai da ka tnat Ministry of Education ka Sorkar Kmie bad kumta na ka liang ka sorkar Meghalaya khamtam ka tnat pule-dangle ka la rai ban shim khia halor kane bad ban wad bniah ïa ki daw tynrai halor kane bad kaei kaba la pynlong ïa ki khynnah ban duna ka jingpynrung kyrteng ïalade ha ki skul Lower Primary bad Upper Primary.”
Haba kylli hato ka sorkar kan khang noh ne em ïa kum kine ki skul kiba don tang hapoh 10 ngut ki khynnah skul, u Myntri u la ong, “Ka jingkhang noh ïa ki kum kine ki skul kam dei eh tang ka lad ban pynbeit ïa ka jingduna, hynrei ka dei shisha pat kaba long ka jingsngewkhia ba ki duna palat ki khynnah kiba pynrung kyrteng ha ki skul Lower Primary bad Upper Primary ha Meghalaya”.
Shuh shuh u la ong ba na ka liang ka tnat Pule-Dangle ka la dep ruh ban pynkynriah ïa ki khynnah na ki skul ba duna kiba pynrung kyrteng sha kiwei pat ki skul ba marjan, hynrei ki don pat katto-katne ki skul ha katto-katne ki jaka kiba jngai na ki shnong bad kum ïa kita ki skul ka tnat kam lah ban shu pynkynriah ïa ki khynnah.
U la ong, “Na ka liang ka tnat pule-dangle kan hap ban wad bniah ïa ki daw kaba pynlong ka jingduna jong ka jingpynrung kyrteng ha ki skul da kaba phah ruh ïa ki ophisar jong ka tnat ban jurip ïa kum kita ki skul namar ki lah ban don shibun ki daw, kum ka jingbym biang ki kamra klas, ki nonghikai lane ki nongpynïaid skul bad kiwei kiwei.”
