Shillong, Risaw 09
Ka Khasi Students’ Union-East Jaiñtia Hills District Unit (KSU-EJHDU) ha ka Lah Sngi U Blei ka la ujor ejahar pyrshah ïa u General Manager/Project Director ka National Highway Authority of India (NHAI) halor ka jingleh bym suitñiew jong u ban maramot ïa ka surokbah NH-6.
“Ka surokbah NH-6 ka hap hapoh ka jingpynïaid ka NHAI bad haba ïadei bad kane, nga kwah pyntip ba ha ka 8 tarik Nailar mynta u snem ha ka por ba ka KSU ka dang ïakhih halor ka jinglong-jingman jong ka surok ka NHAI, uwei na ki nongtrei ka NHAI uba dei u Manager-Technical, u Biswajit Jyoti Lahkar u la kular ba ka tnad kan sa maramot ïa baroh shi lynter jong ka surokbah NH-6 hapoh 6 bnai naduh katei ka tarik jong ka jingjia ha Lumshnong Toll Plaza,” ong u President ka KSU-EJHDU, samla Streamly N. Suchen ha ka ejahar ba la phah sha u SP ka East Jaiñtia Hills.
Haba kdew ba la jan dap phra taïew, u la ong ba haduh mynta, ym pat i don dak eiei haba ïadei bad ka jingsdang ban pyntrei na ka liang ka NHAI wat hadien ka jingkular sha ka seng bad ki nongïakhih ba yn sdang noh mardor ïa ka kam.
“Ha kawei ka liang ka long tang ka jingkular thok bad ka jingbymkitkhia ïa ka kam na ka liang ka NHAI,” ong u samla Suchen.
U la ong ruh ba katei ka jingleh ka NHAI ka la pynwit shi kat dei ïa u paidbah khamtam kito kiba hap ban leit ban wan na katei ka surokbah – ha kaba ka jinglong-jingman jong ka surok ka la nang tlot katba nang mih ki sngi.
Ha kajuh ka por, u la ong ba nalor ka jingsheptieng, katei ka surok ka la buh jingma ruh ïa ka jingim jong ki nongleit nongwan bad nongñiah kali kiba ïaid na katei ka surokbah.
“Nga kyrpad kumta ïa phi ban pdiang ïa kane ka jingujor bad pynshitom katkum ka aiñ pyrshah ïa uba donkti namar ka jingleh jong ki ka la pynthut ïa u paidbah ba bun ba lang, bad ka bha ka miat jong ki nongshong shnong. Kiba kum kine ki jingleh ki long pyrshah ïa ka aiñ bad wanrah ruh ka jingbym shngaiñ ïa ka jingim ki paidbah,” u la ong.
Ka seng kan sa ïakynduh ruh ïa u Deputy Commissioner ka distrik lashai ka sngi ban pan kaiphod halor ka jingtyllun jong ki kam haba ïadei bad katei ka surok.
“Ka seng ka la suba ruh ba lehse ka daw jong ka jingslem ka don kaei-kaei sha lyndet haba ïadei bad ki kam kontrak. Halor kane, ka seng lada ym banse kan hap dawa ban tohkit CBI,” u la ong.
Shuh shuh utei u nongïalam u la pynpaw ba ka jingbym shimkhia ki bor ba dei khmih kan pynbor ïa ka seng ban shim da kiwei pat ki sienjam bad pynurlong ïa katei ka mat kaba ktah ïa u paidbah.
