Shillong, Risaw 09
U Bah Khielangstar Nongbri uba don 30 snem ka rta ba shong ba sah ha Wahnongkseh kaba hapoh ka shnong Sohïong uba la shah dung da ki tiar ba nep na ki bynta jong ka kpoh haduh ban da mynsaw jur ha ka step phyrngab jong ka 6 tarik mynta u bnai (Risaw) ha la u para kur ba la tip kyrteng kum u Arbor Nongbri haduh ban da mih snier shabar mynta u dang don hapdeng ka jingshitom.
Kum ban shu kdew, na ka liang ki bahaïing bahasem jong u Bah Khielangstar hadien ba ki la lap ïa katei ka jingjia ki la pynkit noh ïa u Khielangstar sha Sohïong CHC. Hynrei namar ka jingbym biang ki tiar jingsumar, ki bor sumar jong ka Sohïong CHC ki la phah pynkit noh ïa utei u rangbah mar-mar sha Civil Hospital Shillong ha ka por 7 baje mynstep jong ka 6 tarik mynta u bnai.
Haba ïoh ban ïakren bad ka hynmen trai jong utei u rangbah ha ka Lah Sngi U Blei hapoh Civil Hospital Shillong, ka Kong K Nongbri ka la ïathuh ba ki doktor bad ki nos kiba la sumar ïa u para jong ka ha Civil Hospital Shillong ki la rah noh ïa u na ka kamra OT bad leit buh noh ïa u ha ka kamra Intensive Care Unit (ICU) namar ka jingshitom ka la kham jur.
Katei ka hynmen ka la ïathuh ba watla utei u para u don hapdeng ka jingtip briew hynrei u dang tlot bha bad um pat da lah satia ban kren bha.
Haba kylli ïa katei ka hynmen halor ka daw kaba la pynlong ïa u Arbor ba un dung ïa utei u para jong ka haduh ban da mih snier shabar, katei ka hynmen ka la ong ba utei u para jong ka u la ïathuh ba um don satia kano kano ka daw bad u Arbor kaba la pynlong ïa katei ka hynmen ban don hapdeng ka jingsahdum namar khlem kano kano ka daw utei u Arbor u la dung ïa u para jong ka haduh ban da mynsaw.
“Nga la kylli ïa u para jong nga hynrei u la ong ba um don kano kano ka daw bad u Arbor hynrei utei u Arbor u la prong jubor ïalade shapoh ïing jong u para jong nga bad dung ïa u”, la ong katei ka hynmen.
Katei ka hynmen ka la ïathuh ruh ba kam lah ban mutdur ba utei u Arbor un leh ïa kum katei ka kam namar ba u dei uba ïa ithuh ithaw bha bad uba ju ïajuh ïajan bha kum shi paralok bad u para jong ka.
Shuh shuh katei ka hynmen ka la ïthuh ba ha katei ka por ba u Arbor u la dung ïa u para jong ka watla na ka liang u para jong ka u la ïaleh bad utei u Arbor hynrei utei u Arbor u la ïoh ban dung wiak na kpoh.
