Jowai, Risaw 09
Hapdeng ka jingjaw ummat kthang ki bahaïing hasem ryngkat ka Balang Presbyterian Pynthor Langteiñ ki la tep donburom ïa saw ngut ki shi ïing ha kajuh ka thliew ha u lum jingtep ka Balang Presbyterian Pynthor Langteiñ ha ka Lah Sngi U Blei.
Kine saw ngut shi ïing ki la khlad jyndat noh tang shiteng por nangne na sla pyrthei hadien ba ka khyndew kaba twa ka la taplup ïa ka ïingsah jong ki ha ka por ba ki dang ïohthiah lyngngai.
Kane ka jingjia shah taplup ha ka khyndew na ka daw ka jingjur u lapbah, ka la jia ha ka step Sngi U Blei ha Pynthor Langteiñ kaba hap hapoh ka thanat Jowai ha West Jaiñtia Hills District.
Kitei saw ngut kiba la khlad ki long u kpa ka ïing u Bah Biangki Phawa 31 snem ka rta, ka kurim jong u, ka Kong Pynjanai Ryngkhlem 25 snem ka rta lem bad ar ngut ki khun kiba dangrit kiba kyrteng u Edify Ryngkhlem 6 snem ka rta bad ka Vladaroi Ryngkhlem ba dang 3 snem ka rta.
Ha ka sngi kaba bud pat kata ha ka Lah Sngi U Blei, la pyndep ïa ka jinglehniam ba khatduh ha phyllaw ïing ha kaba la ïoh jingkren na ka Kur Ryngkhlem, Kur Phawa kumjuh na ka shnong ba la kren da u Waheh Shnong u A Lipon bad na ka Government LP School Pynthor Langteiñ.
Hadien ba la pyndep ïa ka jinglehniam, la rah ïa kine saw ngut shi ïing ïa kiba la thep la ka jong ka synduk hynrei ynda la poi ha u lum jingtep la tep lang hajuh ka thliew.
Ha kane sngi khatduh da ki hajar ngut ki paidbah najan bad jngai ki la wan ban pynshngaiñ bad sngewlem na ka bynta kane ka longïing kaba la mad ïa ka jingjia kaba sngewsih kthang.
