Jerusalem, Risaw 09 (UNI)
U Myntri ka tnat Ïada Ri ka Israel, u Yoav Gallant, u la ai hukum ban kerkut lut ïa ka Gaza Strip ha ka Lah Sngi U Blei kum ka jingpynhiar kput ïa ka jingwan thombor da ka Hamas ïa ka Israel. Ka Hamas ka dei kaba synshar ïa ka Gaza Strip.
“Ngin kerkut lut ïa ka Gaza,” la ong u Gallant haba kren lyngba ka ‘video’ hadien ba u la peit bniah ïa ka jinglong jingman ryngkat bad ki heh shipai ka Israel. “Ngin ym ai bording, bam, umphniang…ngi la khang lut ïa baroh,” la ong u Myntri. Na ka liang u Myntri ki kam bording, u Israel Katz, u la ai hukum ïa ka kompani sam umbam umdih jong ka Israel, ka Mekorot, ban khang noh syndon ïa ka jingai umbam umdih sha ka Gaza. U la ong ruh ba la dep ban ot ïa ka bording bad umphniang ha Gaza ha ka Sngi U Blei.
Kine ki sienjam ba la shim da ka Israel ka long hadien ba la mih ka jingthombor ki lehnoh Hamas ïa ka Israel ha ka Sngi Saitjaiñ. Naduh ka Sngi Saitjaiñ bad haduh mynta, ki la don kumba 700 ngut ki briew kiba la khlad ha Israel katba kiba la khlad na Gaza na ka jingthombor ka Israel ki don kumba 493 ngut.
Ka Israel ka peit halor ka jingsam boding sha ki katto katne ki bynta jong ka Gaza bad kumjuh ruh ïa ka jingwanrah bad jingdie ïa ki mat ki mata, ki dawai dashin, bad ka jingrung jingmih jong ki briew ha kane ka jaka. Ha Gaza Strip, ki nongshong shnong ki don kumba 2.3 million ngut.
