Tura, Risaw 09
Ka bynta jong ka surok hapdeng ka surokbah NH-51 hapdeng ka Dalu bad Tura ka la twa hynnin janmiet hadien ka jingjur u slap uba la neh ha ka thaiñ naduh kane ka taïew ba la dep.
Katba ka surok, katkum ka jingong ki bor distrik ka dang long ban pyndonkam, kaba bun ka bynta jong ka (surok) ha ka shnong Jengitchakgre ka la twa, ha kawei ka liang kaba buh jingeh ïa ki nongleit nongwan.
Ka surokbah NH – 51 ka la don hapdeng ka jingshna mynta la palat 5 snem bad haduh mynta, ym pat lah ban pyndep ïa ka. Katba u kontraktor uba dei hok na bynta ka 50 km u la ieh noh ïa ka surok, sa kawei ka kompeni ka dang pyntrei ban pyndep ïa ka mynta watla ka mad jingeh shi kat dei ha ka lynti ïaid jong ka.
Hynnin ka miet, kawei na ki bynta jong ka surok kaba dang shu pyndep shen ka la tlor noh bad haba peit na ka jingtwa, yn ym pat lah ban pyndonkam ïa ka surok ïa mynta. Hynrei wat hadien kiba bun ki jingpyrshang ban kynjoh ïa u Deputy Commissioner halor kane ka bynta, ym shym la ïoh satia. Ha kawei ka liang, u la phah ïa ka ‘message’ kaba ong ba ka jingïaid jong ki kali ka long.
Ka tnad PWD (Roads) ka la bynrap ba kam don jingtip eiei haba ïadei bad ka jingtwa naba ïa ka surok la khmih da ka NHIDCL.
Ka jingthmu ban pyndep ïa ka surok ka la sakhi ïa kiba bun ki jingeh kiba la mih kynthup ïa ka bynta kaba la ngam ha ka rukom ba phylla hapdeng ka 12 Mer haduh Kherapara, ha kaba la ieh noh ïa ka kam katba ym pat lah ban pynbeit halor kane.
Ha kawei ka liang, haba kren halor ka jinglong-jingman jong ka surok, u Deputy Commissioner ka WGH, u Jagdish Chelani u la ong ba dang wad ïa ka daw ban pyntikna halor ka jingtwa jong ka surok watla kam shym la don ka jingbatai ïa mynta.
“Ngi dang ap ïa ka ejahar halor ka jingjulor khnang ban lah pynbiang shuh ïa ki jingtip. Ïa mynta, kawei ka bynta jong ka surok la pyndonkam na bynta ban ïaid kali,” ong u DC.
