Tura, Risaw 09
Ki nongtrei ka GHADC hapoh ka shatri jong ka Non-Gazetted Employees Association (NGEA) ha ka Lah Sngi U Blei ki la pynsangeh noh shuwa ïa ka jingïakhih shong kyllaiñ mungor hadien ba ki bor ba dei khmih ki la pyllait ïa ka tulop ba 2 bnai jong ki.
Ki nongtrei ki la rai ban sdang ïa katei ka jingïakhih halor ka jingbym siew dep ïa ka tulop kaba 31 bnai.
“Ngi la pynsangeh noh shuwa ïa ka jingïakhih namarba ki bor ba dei khmih ka GHADC ki la pyllait ïa ka tulop sahteng ba 2 bnai jong ngi mynta ka sngi,” ong u nongïalam ka NGEA, u Brithen Sangma.
Ha kawei ka liang, haba kdew ba ka jingpyllait ïa ka tulop kaba tang 2 bnai kam pat biang na bynta ki nongtrei, u Sangma u la ong ba kin ïai bteng ban ïakhih hadien lada ki bor ba dei khmih kim leh eiei ban pyllait ïa ka jingsiew ba sahteng.
Kham ha shuwa ïa kane ki nongtrei ka Garo Hills Autonomous District Council (GHADC) hapoh ka shatri jong ka NGEA ki la rai ban ïaid shakhmat bad ka jingïakhih halor ka jingbym siew ïa ka tulop kaba 31 bnai jong ki nongtrei.
Katei ka rai ka la wan hadien jong ka jingbym lah u CEM, u Albinush Marak ban pynurlong ïa ki kular ba la khlei ha ka 18 tarik u Nailur – uba la wan mih hi da lade sha ka jingïalang ïakhih jong ki nongtrei ha ryngkat ka jingkular ban siew dep ïa ka tulop kaba 2 bnai hapoh katei kajuh ka taïew.
Katei ka jingkular katkum ki dkhot ka NGEA ka la pulom, ha kawei ka liang, kaba pynbor ïa ki nongtrei ban ïaid shakhmat bad ka jingïakhih.
