Shillong, Risaw 09
Ki Ïing Dak lane ‘Post Office’ ki dei kiba dang donkam bad ïaid kam bha wat hapdeng ka jingmih ki kor ki bor ka juk stad mynta kiba la nang pynsuk ha ka rukom pathai jingtip kynthup ka jingphah shithi hapdeng ki shlem treikam jong ka Sorkar bad ka jingphah ïa ki shithi shimet kiba ym da donkam shuh ban phah lyngba ki Ïing Dak.
Ïa kane la pynpaw da u Chief Post Master General ka North East Circle, u Subrat Das haba kren sha ki lad pathai khubor ha ka Lah Sngi U Blei ha shlem treikam ka Ïing Dak ha kaba u la pynbna ruh ïa ka jingrakhe kaba shi taïew jong ka Ïing Dak ha ka ri lane ka National Postal Week, kata naduh 9 tarik haduh 13 tarik mynta u Risaw.
U Das u la batai shaphang ka jingrakhe ïa ka sngi jong ki Ïing Dak ha pyrthei (World Post Day) kaba ju rakhe ha ka 9 tarik Risaw ban rakhe ka jingsdang ïa ka Universal Postal Union ha u snem 1874 ha nongbah Swiss ha Berne.
Kane ka jingrakhe, la pynbna naduh u snem 1969 ha nongbah Tokyo ha Japan ban pynshai paidbah halor ka jingkongsan ka jingshakri jong ki Ïing Dak na ka bynta ki paidbah bad ki jingnohsynñiang ha ka jingtreikam, ka imlang sahlang bad ka ïoh ka kot ha kaba la rakhe ruh ha India baroh shi taïew.
Haba kylli shaphang ki jingtreikam ki Ïing Dak ki la shah ktah ne em ha kane ka juk ki kor ki bor, u Das u la ong ba ki Ïing Dak ki don la ki bynta jong ki ban ai jingshakri.
Hynrei u la kubur ba lada dei ha ka rukom phah shithi, ka la duna bha namar ka jingdon ki kor ki bor kum ka email, nalor ki social media kum ka Facebook, WhatsApp, Instagram, X (twitter), bad kiwei kiwei ki lad phah jingtip kiba kham sted. U la ong ba ha kane ka juk kaba mynta, ki briew kim phah shuh da ki shithi sha ki bahaïing ym kum ha ki por mynshwa.
“Ki khun ha kane ka juk mynta, ha ka jaka ban phah shithi sha ki kmie ki kpa kum ha ki sngikha jong ki, ki phah noh da ki jingai sngewbha bad ïa kane ki ju phah lyngba ki Ïing Dak. Kane hi ka paw ba ki briew ki dang shaniah ha ka Ïing Dak haba ki phah ei ei sha ki paralok ne sha ki bahaïing bahasem,” la ai nuksa u Das.
Kumta u la pynksan ba wat ha kane ka juk ba pyndonkam da ki kor ki bor kiba thymmai, ka jingdon ki kor ki bor kam shym la pynduhbor ïa ka jingtrei kam jong ki Ïing Dak bad ki dang long hi kawei na ki lad ba ki paidbah ki dang shaniah khamtam haba ïadei bad ka jingphah ïa ki tiar ki tar na kawei ka jaka sha kawei pat.
U Das u la bynrap ba ki Ïing Dak ruh ki treikam bad ïaid lang katkum ka jinglong ka por khamtam ha ka rukom pyndonkam ïa ki kor ki bor ka juk stad mynta.
