Jowai, Risaw 09
Ka synjuk ki trai trok kiba don hapoh ka lama Jaiñtia Hills Truck Owner Association (JHTOA) ka la weng noh ïa ka jingïakhih kaba khlem buh por ha ka 9 tarik Risaw hadien ba ka synjuk ki karkhana pynmih dewbilat kiba don ha ka thaiñ East Jaiñtia Hills District ki la mynjur ban ai bhah ban kit mar 40 tylli ki trok ha ka shi sngi.
Ïa kane ka rai la shim hadien ka jingïalang ka JHTOA, ki synjuk ki karkhana dewbilat, ka East Jaiñtia Hills Truck Owners and Transporters Association (EJHTOTA) bad ka bor synshar district jong ka East Jaiñtia Hills District.
Kane ka jingïalang ka la ïakut ban ai mar 40 trok shi sngi ïa ka JHTOA bad ka EJHTOTA.
Haba ïakren bad u President ka JHTOA u Bah Biangshwa Shylla, u la ïathuh shwa ba ka JHTOA kan shim ïa ka rai ban weng noh ïa ka jingïakhih, ka la don ka jingïalang pynbeit hapdeng ki bor pynïaid District jong ka East Jaiñtia Hills ba kynthup u Additional Deputy Commissioner bad Superintendent of Police, ka JHTOA kumjuh ka synjuk ki karkhana pynmih dewbilat kiba don hapoh ka lama jong ka Jaiñtia Hills Cement Manufacture Association bad ka East Jaiñtia Hills Truck Owner and Transport Association (EJHTOTA) ban ïakren ïa ki mat jingdawa jong ka JHTOA.
U la ong ba ha kane ka jingïalang, ka synjuk ki karkhana pynmih dewbilat ki la kular ban ai 40 tylli ki trok ïa ka JHTOA bad 40 tylli ïa ka EJHTOTA bad kane ka jingïapynbeit kan long na ka bynta shi bnai shwa.
Ha kajuh ka por u la ong ba ka ophis u DC bad SP kin kheiñ ban ai katkum ka jingdon ki kali hapdeng kine ki ar seng (JHTOA bad EJHTOTA).
Kum ban shu pynkynmaw ka JHTOA ka la pynlong ïa ka jingïakhih kaba khlem buh por naduh 5 tarik Risaw ha Tuber Tahkhniang namar ba ki karkhana pynmih dewbilat kiba don ha ka thaiñ Lumshnong, Wahïajer bad Thangskai na ka por sha ka por ki thok palat ha kaba ïadei bad ka kit ka bah.
