Jerusalem, Risaw 10 (UNI)
Kumba 1,008 ngut ki briew ki la khlad ha Israel naduh ba ki ‘riew pyntriem ka kynhun Hamas ki la rung sha kane ka ri ha ka Sngi Saitjaiñ, la ong ka Kan TV News jong ka sorkar Israel ha ka Sngi Ba-Ar.
Nalor kitei kiba la khlad, ki don ruh 2,741 ngut kiba la mynsaw naduh ba sdang ka jingthombor ha ka Sngi Saitjaiñ haduh mynta. Hynrei na kine kiba la mynsaw, sa tang 544 ngut ki dang don hapdeng ka jingshah sumar ha ki hospital ha Israel.
La ong ruh ba naduh ka Sngi Saitjaiñ, la ther haduh 4,949 tylli ki ‘nam ding sha Israel.
Na ka liang ka Israeli Defence Forces ka la ïathuh ba la lap ïa kumba 1,500 tylli ki metïap jong ki lehnoh Hamas ha ki bynta ba shathie jong ka Israel.
Ha kaba ïadei pat bad ka jingïap briew ha Gaza Strip, ka tnat ka koit ka khiah jong ka Palestine ka la ïathuh ba haduh mynta ka sngi, 788 ngut ki la khlad bad 4,100 ngut ki la mynsaw naduh ba ka Israel ka la sdang ban ther ïa kane ka jaka.
Ha kawei pat ka liang, haba ai jingkren ha ka miet jong ka Lah Sngi U Blei, u Myntri Rangbahduh, u Benjamin Netanyahu, u la ong ba ka Israel ka don hapdeng ka thma.
Hynrei u la ong ruh, “Ngi khlem kwah ïa kane ka thma. La pynbor ïa ngi da ki lynti kiba shyrkhei tam bad kiba long ‘riewkhlaw. Hynrei watla ka Israel ka khlem sdang ïa kane ka thma, hynrei dei ka Israel pat ka ban pynkut ïa ka.”
U Netanyahu u la ong ruh, “Ka la don ka sien ba ki Jew ki khlem don la ka jong ka Ri. Ka la don ka khep ba ki Jew ki khlem lah ban ïada ïalade. Hynrei mynta kam long shuh kumta.”
Haba kynthoh ïa ka kynhun pyntriem Hamas, u Myntri Rangbahduh ka Israel u la ong, “Ka Hamas kan sa sngewthuh ba da kaba thombor ïa ngi, ka la leh ïa ka jingbakla kaba jur tam. Ngin pynhiar kput tat haduh ba ma ka bad kito kiba shun ïa ka Israel kin kynmaw da ki phew snem ban wan.”
Nalorkata, u Netanyahu u la ong ba ka jingthombor kum ki ‘riewkhlaw da ka Hamas pyrshah ïa ki nongshong shnong ba lui-lui ka long kaba la palat liam ha kaba la pynïap syndon hapoh ïing ïa ki briew, la pynïap ïa ki samla kiba la ïashim bynta ha kawei ka tamasa, la rahbor ïa bun ngut ki kynthei, khynnah bad wat ki tymmen ki tro.
“Ki lehnoh Hamas ki la teh la khum, thang bad pynïap ïa ki khynnah. Ki dei ki ‘riewkhlaw. Ka Hamas ka dei ka ISIS,” la ong u Myntri Rangbahduh da kaba bynrap ba ki Ri ki dei ban wan lang ban kyrshan ïa ka Israel ban pynrem ïa ka Hamas kumba la pynrem ïa ka ISIS.
Haba kren shai ba ka Israel kan sa jop ïa kane ka thma, u Netanyahu u la ong, “Haba ka Israel ka jop, ki Ri kiba la shai baroh ki jop lang.”
