Shillong, Risaw 10
Uwei u ophisar ka Jylla u la khlad kyndit ha ka Sngi Ba-ar hadien ba ka jingshitom ka la ban kynsan ïa u na ka daw ka jingthut u klongsnam.
Ïa une u ophisar ka Sorkar Jylla la tip kum u Manjunatha IFS, uba ju peit ruh ïa ka tnat ri jingri ka Jylla nalor kiwei pat ki tnat treikam ka Sorkar Jylla.
Katkum ka tyllong khubor, la ong ba ka long kaba kyndit haduh katta katta ban tip ba u ophisar IFS, Manjunatha uba bat ïa ka kyrdan Secretary ka tnat Veterinary bad kiwei ki tnat ka Sorkar Jylla u la khlad na ka daw ka jingshitom klongsnam.
Kane ka la jia ha ka nohphai sngi jong ka Sngi Ba-ar.
Ha ka por janmiet la wanrah ïa u sha Woodland Hospital na ka jaka sah jong u ha Forest Colony Polo, namar u don marwei ha ïing.
Hynrei ki nongsumar ki la pynbna ba une u ophisar u la khlad noh bad ka long shisha ka jingkyndit kaba khraw ïa baroh ki ophisar ka Sorkar Jylla bad ki nongtrei ruh kumjuh.
Na ka liang ki ophisar ki la phah ka jingsngewlem halor kane ka jingkhlad kyndit une u ophisar IFS ka Jylla.
