Mawkyrwat, Risaw 10
Ka jingleh donbor bad thombor jong ki shipai Border Security Force (BSF) ïa ki paidbah ha ki jaka khappud kam dei shuh kaba dang thymmai. Kane ka ju jia na ka por sha ka por bad ïa kane la sakhi dang ha une u bnai ba la dep ha kaba ki shipai BSF jong ka Bagli Border Outpost ki la rung jubor ha ka dukan jong ka Kong Tilian Lyngdoh Lyngkhoi kaba don ha Bagli, South West Khasi Hills District bad knieh jubor ïa ka shini kaba don kumba 45 byrni eiei.
Katkum ka jingïathuh jong u khun ka Kong Tilian, u Banshimbor Lyngkhoi u la ong ba ha ka janmiet jong ka 28 tarik u Nailur 2023 ha ka por kumba 4:30 eiei, ki shipai BSF ki la knieh jubor ïa ka shini kaba don kumba 45 byrni kaba la kot sha T.96,750 eiei, da kaba kynnoh ba kane ka shini ka dei kaba mut ban khaiï beaiñ sha Bangladesh.
Hynrei katkum ka jingïathuh u samla Banshimbor u la ong ba kane ka shini ka dei kaba ki mut ban die tang ha ki nongshong shnong bad ha ïew. Kane ka jingkit bun ïa ka shini ka dei namar ka jingkiew dor bad ka jingjngai palat ka lynti.
Shuh shuh u la ïathuh ruh ba wat la na ka liang ka kmie ka la pyrshang ban ïasaid bad pyni nia hynrei kine ki BSF kim shym la sngap bad ha ki sngi kiba bud haba pyrshang ban leit pan ki la ai-daw pynban ba ki la aiti ha ka tnat Custom, katba ka jingshisha katkum ka jingïathuh kine ki trai dukan ka long ba kim shym la aiti satia sha ka tnat Custom hynrei ki la die kylla ïa ka shini sha kiwei pat ki briew.
Ha kaba ïadei bad kane ka jingknieh jubor ki BSF ïa ki mar bam jong kane ka longkmie, ka KSU South West Khasi Hills District hapoh ka jingïalam u samla Forwardman Nongrem da ka jingsngewkhia halor ka jingshah pyndik jong ki nongkhaïi kiba dei ki Khasi ha ka thaiñ Bagli, ka seng ha ka 10 tarik mynta u bnai (Risaw) ka la leit ban ujor ha u Deputy Commissioner jong ka SWKHD.
Ha ka jingïakren, ka seng ka la dawa ïa ki bor distrik ba kin tuklar bad shim khia mardor ïa kum kine ki kam pyndik ïa ki kup shiliang sem shiliang bad kaba pynsyier bad pynrit mynsiem ïa ki trai ri trai muluk.
Ka seng ka la pynpaw ruh ba ka jingkynnoh ki BSF ka long kaba khlem nongrim, ka bym shongnia, ka jingpharep jubor bad ka dei ka jingkhñiot beiñ ïa ki rit ki ria.
Ka seng la la dawa ruh ïa ki shipai BSF jong ka Bagli Border Outpost ba ki dei ban pynphai ne siew noh da ka pisa sha kane ka trai dukan, bad khatduh ka seng ka dawa ruh ïa ki bor distrik ba ki dei ban khot ïa kine ki shipai BSF ban ïakren khnang kum kine ki jingshah pyndik kin nym jia shuh nangne shakhmat.
