Shillong, Risaw 10
Ka long shisha ka khubor kaba pynkyndit thret ïa ki nongpynmih phlim namar u Symbud Myntri Rangbah ka jylla, Bah Sniawbhalang Dhar uba dei u MLA ka NPP na Nartiang u la wan sha Bijou Cinema Shillong kum u ‘riew paidbah ban peit ïa ka phlim ‘Johkhe.com’ ha ka janmiet jong ka Lah Sngi U Blei ka 9 tarik Risaw, 2023.
U Bah Dhar ryngkat ki bahaïing hasem u la poi ha Bijou Cinema Shillong ban peit ïa ka phlim Johkhe.com ha ka por 8:00 baje mynmiet kaba la kut haduh ka 11:00 duna mynmiet.
Ki trai jong ka phlim Johkhe.com kata u Marboon Laloo bad u Bah Dao Toi kiba dei na Jowai haba ki dang don ha Bijou Cinema ki la kyndit thret haba u Bah Sniawbhalang u la kren ïa ki katba u dang shong bad ki bahaïing ha jaka shong jahthait ki paidbah ha katei ka jaka.
Nalor kane kaba pynkyndit shuh shuh ïa ki trai jong kane ka phlim namar kat u Symbud Myntri Rangbah ka sorkar jylla u la wan peit ïa ka phlim kum u ‘riew paidbah, khlem da donkam ban pyntip sha ki trai jong ka phlim.
Kumta ki la ai khublei ïa u Bah Sniawbhalang Dhar uba la wan kyrshan ïa ka phlim jong ki ha Bijou Cinema, Shillong.
Ka jingwan poi u Bah Sniawbhalang sha Bijou Cinema ka dei namar u la ïohi ha ki social media ïa ka jingshongshit ki paidbah kiba la wan peit ïa kane ka phlim naduh sngi sdang kata ka 6 tarik haduh 8 tarik Risaw 2023 kat haduh ba ki bahaïing jong u bad ma u ki la hap ban pyllait khnang ïa ka por ha ka janmiet jong ka Lah Sngi U Blei ban shong ruh ha balcony kaba ju shong ki ‘riew paidbah.
Na ka liang u Bah sniawbhalang u la ong ba ka jingwan peit ïa ka phlim Johkhe.com ha Bijou Cinema bad ki bahïing ka dei namar u ju peit ïa ki phlim jong u Maheh Marboon Laloo bad u Dao Toi ha ki por ba kham mynshuwa namar ki tbit palat ban ak biria.
U la ong ba dei ban wan ha kine ki sngi tangba bunkam palat, kumta u la pyllait por khnang khnang ha ka sngi lah sngi u blei kum shibynta ban ai jingkyrshan ïa ki nongak phlim na rilum Jaiñtia.
