Shillong, Risaw 10
Ka North Eastern Hill University Teachers’ Association (NEHUTA) kan pynlong da ka jingïakhih shong kyllaiñ mungor ne ‘Dharna’ hakhmat ophis treikam u Vice-Chancellor (VC) ka North Eastern Hill University (NEHU) ha ka Sngi Palei kum ka dak jingpyrshah halor ka jingbymïahap ïa ka rukom pyntreikam ïa ka National Education Policy (NEP-2020) nalor kiwei-kiwei ki jingpynkheiñ kyndon jong u VC ha kine ki 2 snem ba la dep.
“Ngin pynlong ïa ka ‘Dharna’ ha ka Sngi Palei ha ka por 3 baje nohphai sngi. Ngin sdang da ka jingïaid paidbah na Library sha ophis treikam u VC,” ong u President ka NEHUTA, Prof. Lakhon Kma ha ka Sngi Ba-ar.
U la ong ruh ba wat hadien ba ki dkhot ka Academic Council (AC) ka skulbah ki la dawa na bynta ban khot mardor ïa ka jingïalang ba kyrkieh jong ka AC, halor ka jingkynnoh pyntreikam ba khlem ïahap ïa ka NEP-2020 ha ka kyrdan ‘Under Graduate’ (2023-24), u VC, Prof. P.S. Shukla u la leh kum bym patiaw halor kane ka bynta.
“Mynta um don lad shuh da kumwei. Palat 100 ngut ki dkhot ka AC na Shillong bad Tura (NEHU) ki la ïasoi ïa ka jingdawa ban khot ïa ka jingïalang ba kyrkieh jong ka AC – kaba long palat ïa ka jingdonkam paid ba shipawa na ka laipawa ka jingdon ki dkhot ka AC katkum ka Regulation RA-5, Clause 13, hapoh Clause (1) (a) bad (2) of Statute 42. Kumta un hap beit ban khot ïa ka jingïalang jong ka AC,” ong u Prof Kma da kaba bynrap ba ka jingai por halor kane ka la kut noh hynnin ka sngi.
U President u la pynshai ruh ba ka jingïakhih ha kane ka kynti kan ym dei tang halor ka jingbymïahap ka rukom pyntreikam ïa ka NEP-2020 hynrei na bynta kiwei-kiwei ki jingpynkheiñ kyndon jong u VC ha kine ki 2 snem ba la dep ba kynthup ïa ki jingthung kam nalor kiwei-kiwei.
Haba kylli, u la ong ba ka eksamin ha ka kyrdan UG ka dei ban long ha kaba kut jong u Naiwieng mynta u snem.
“Hynrei ka jingbym sngewthuh, jingkuman bad jingbym don jingsngew jong u VC bad namar ka jingmeng jong u, u kloi ban len ïa ka lawei jong ki samla pule ‘Under Graduate’. Hooid, ngim ïakren ban pynkylla biang namar ym lah shuh, hynrei ban pynbeit noh shi syndon ïa kane ka jingeh halor ka NEP-2020 khnang ba ngin ïoh pynlong ïa ki eksamin ha ka rukom kaba ïaid beit ïaid ryntih kumjuh ban pynkhreh ïa ka ‘Syllabus’ na bynta ka 3-8 ‘Semester’,” u la ong.
Haba pynpaw ïa ka jingbitar pyrshah ïa u VC, u Prof, Kma u la ong ba une u VC u long u bym kitkhiah, uba dap da ka jingmeng bad u dei ruh u VC u bym larkam tam ha ka khana-pateng ne ‘history’ jong ka NEHU.
Shuh shuh haba kylli, u President ka NEHUTA u la ong ba lada katei ka jingïakhih kam seisoh, kata ka seng kan nang pynjur ïa ka jingïakhih bad dawa ruh ban weng kam noh shi syndon ïa ka Prof. Shukla na ka kyrdan VC.
Ka seng ka khot ka wer ruh ïa ka jingkyrshan bad ka jingïashim bynta jong ki seng kiba don kajuh ka rukom pyrkhat kum ka MCTA, NEHUSU bad NEHUNSA lem bad kiwei-kiwei kiba don ka jingsngewkhia halor ka jinglong-jingman ka skulbah hapoh ka Jylla.
