Shillong, Risaw 10
U Dr. W.R Kharlukhi uba dei u MP ka Rajya Sabha ryngkat bad 26 ngut kiwei pat kiba dei ki nongleit Pilgrim na Meghalaya sha Israel, ha kine ki khyndiat sngi ban wan kin sa ïoh ban wan phai suk noh sha la ka jong ka Jylla.
Ïa kane la pyntip da u Symbud Myntri Rangbah ka Jylla Bah Sniawbhalang Dhar haba ïakren bad ki lad pathai khubor ha ka Sngi Ba-ar, ha kaba u la ong ruh ba kine baroh 27 ngut ki biang lut nadong shadong bad ki la lait lut na ki jingma baroh.
Lah ban pynkynmaw ba ha ka sngi Saitjaiñ ka la khie ka thma hapdeng ka Israel bad Palestine, bad ha kum kane ka por, kine ki 27 ngut ki nongshong shnong ka Meghalaya ba kynthup ruh ïa u MP ki la don sha Israel ban leit Pilgrim.
“Dang mynshisngi, kine ki nongshong shnong ka jylla ki la jam sha shiliang u pud ka Egypt hadien ba ka la khie ka thma Israel bad Palestine bad baroh ki biang lut nadong hadong,” la ong u Bah Sniawbhalang.
Shuh shuh u Bah Sniawbhalang u la pyntip ba hadien ka jingkhie ka thma ha kitei ki ri, na ka liang u Myntri Rangbah ka Jylla u Conrad K Sangma u la shimkhia bha ïa kane ka kam bad u la ïai buddien khlem sangeh bad ka Sorkar India.
“Katkum ka jingong jong u, ki 27 ngut ki la jam sha shiliang pud bad kam don jingeh shuh ïa ki bad kin sa wan phai noh ha kine ki khyndiat sngi sha la ka jong ka Jylla,” u la ong.
