Shillong, Risaw 10
U Symbud Myntri Rangbah ka Jylla, Bah Sniawbhalang Dhar uba khmih ïa ka tnat Transport u la ong ba ka Sorkar jylla haduh mynta kam pat pynsangeh ïa ka jingthmu ban pynpoi lynti rel ha Ri-lum Khasi Jaiñtia, hynrei ka dang bishar bniah bha shwa.
“Ngim pat pynsangeh satia ïa kane ka jingthmu ban wanrah lynti rel hynrei ngi dang shong bishar ïa kane ka bynta,” la ong u Bah Sniawbhalang haba kren sha ki lad pathai khubor.
Ka projek lynti rel ha Ri-lum Khasi-Jaiñtia ka la mad ïa u diengpyngkiang namar ka jingtynjuh pyrshah jong ki kynhun bapher bapher kynthup ki seng. Kane ka projek ka kynthup ïa ka lynti rel Tetelia-Byrnihat ba jrong 22 Km bad ka Byrnihat-Shillong ba jrong 108 Km.
Namar kane, ka Sorkar Jylla ka la rai ban wad ki lad ki lynti ban pynïasoh lynti rel noh ha East Jaiñtia Hills District hynrei ïa kane ruh la ïeng pyrshah jur da ki paidbah.
Haba pyntip halor kane, u Bah Sniawbha-lang u la ong ba ka Sorkar haduh mynta kam pat shim rai satia la kan pynïaid beit shakhmat ne em ïa ka projek lynti rel.
“Kane ka wan jia namar ngi donkam ban ïakren shuwa bad baroh ki kynhun bapher bapher bad dei tang hadien kane ba ngin sa lah ban shim rai,” u la ong bad bynrap ba ka jingpyrshah ïa kum kine ki projek kin don beit.
U la pyntip “Hynrei ka dei ka kamram jong ka Sorkar Jylla ban pynshai halor ka jingkongsan ka lynti rel ïa ka Jylla bad namar kata, ki Deputy Commissioner kila pynlong ïa ki jingïalang pynsngewthuh paidbah na ka por sha ka por”.
“Ngin dang bteng ban don ki jingïakren bad ki kynhun bapher bapher bad lada ki ong em ïa kane, kumta na ka liang jong ngi ruh, ngin sa pynsangeh noh shi syndon,” la ong u Bah Sniawbhalang.
