Shillong, Risaw 10
Ki heh ka World Bank ki la pynlut por baroh shisngi ha ka Sngi Ba-ar ka 10 tarik Risaw, 2023 ban leit peit ïa katto-katne ki jaka khamtam ban tip shaphang ka jingjyllei ki jaboh jabaiñ ha kane ka nongbah bad khapsor.
Ha kane ka jingleit jong ki heh ka World Bank, la don ryngkat lang u Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem bad ki la sdang leit peit ïa ka Wah Umkhen kaba don ha Them Basuk markhap bad ka shnong Jyntah bad Madanrting ha kaba ki la sakhi ïa ka jingjakhlia jong kane ka wah kaba long ruh ka tyllong ban tan umbam umdih.
Ynda la dep na Wah Umkhen, ki leit sa sha ka shnong Umpling bad ki la ïakynduh ïa ki nongkitkam ka Dorbar Shnong kiba don marjan naduh ka Lapalang, Nongrah bad Umpling bad kylli jingtip halor ka rukom lum ïa ki jaboh jabaiñ ha shnong ha thaw bad ka jingsiew da ki longïing sha ka shnong na ka bynta ka bai kit ñiut.
Na Umpling, ki heh ka World Bank lem bad u CEM ki la leit sa sha Mawlai Mawroh ha ka jingdonlang u MDC ka Mawlai u Bah Teiborlang Pathaw lem bad u Rangbah Shnong bad ki nongkitkam ban peit ïa ka jaka ban shna ïa ka Resource Recovery Centre. Ynda la dep na Mawlai Mawroh, ki la leit peit sa ïa ka jaka pyllang jaboh jabaiñ ha Marten ha Mawlai Mawïong ha kaba ki la kylli jingtip kham bniah na ki nongpeit ïa ka rukom pynkhuid ïa ki jaboh jabaiñ.
Na ka liang ki heh ka World Bank kim shym la kren ei ei namar ki wan ban lum jingtip bad phah kaiphod sha ki bor bahalor.
Hynrei na ka liang u CEM u la batai shaphang kane jingleit peit ïa ki jaka bad ïathuh ïa ki lad ki lynti kiba ka KHADC ka la shim haba dei bad kumno ban weng ïa kane ka jingeh kaba la pynlong ïa ki um ki wah ban jakhlia namar ka jingbret pathar hi da mangi ki paidbah.
U la ong ba ki wah kiba dang lah ban tehlakam ïa ka jingbret pathar ïa ki jaboh jabaiñ kum ka Wah Umkhen kim dei ban jaboh kumba long kiwei pat ki wah kiba la jubor ka jingjakhlia kum ka Wah Umkhrah bad Umshyrpi.
Haba kylli halor ka jinglap jingshem ki heh ka World Bank, u Bah Pynïaid u la ong ba ki briew ka World Bank kiba kynthup ïa u Thierry Martin, u Keith Newman, bad u Riddhiman Saha, na ka jingbatai jong ki, ka long kaba sngewtynnad ïa ki ban kin tip ba ka la don lypa ka jingpynkhuid shnong ha Rilum Khasi Jaiñtia bad don ruh ha ki ka jinglong ban lehkhuid.
Kumta u la ong ba ki briew ka World Bank ki shem ba kan nym don jingeh ban wanrah ïa ka khuid ka suba namarba ka jingkhuid ka la don lypa ha ka jingmut jingpyrkhat ki nongshong shnong.
U CEM u la ong ruh ba da ka jingdon jong ka aiñ bad ki kyndon ka KHADC, baroh ki shnong mynta ki hap thaw ïa ka solid waste management committee ha man la ki shnong ryngkat ki dorbar shnong bad ka jingïatreilang bad ki nongshong shnong.
