Shillong, Risaw 10
Ka Khasi Students’ Union (KSU) Laban Circle ha ka 9 tarik mynta u bnai ka la ai da ka dorkhas sha u Chief Engineer jong ka tnat PWD (Roads) ban pynpaw ïa ka jingpyrshah halor ka jingtei pandal ne ki dara na ka bynta ban lehniam Puja ha surok ba dei peit jong ka PWD.
Ha ka kyrwoh khubor ba la pyllait, ka seng ka pynpaw ba kam shym don jingpyrshah eiei ïa ka jingleh niam jongno-jongno ruh hynrei kam dei pat ban pynwit ïa ka ïaid ka ïeng jong u paidbah.
Ka KSU Laban Circle ka la ban jur ba ki surok ha Laban ki la long lypa kiba khim, bad ka jingshna pandal na surok bad ka jingbuh dukan ha surok ka dang pynkhim shuh shuh ïa ka surok, kaba la wanrah ïa ka jingkhapngiah bad ka bun sa ka dheng kali bad ka long ka jingpynwit ïa ka ïaid ka ïeng jong u paidbah.
