Nongstoiñ, Risaw 10
Hadien dangshen ka la don ka jingjia ba sngewsih haba ïadei bad ka jingkhlad noh i khunlung namar ka jingdheng kali haba pynlong ïa ka jingïakob khwai dohkha. Kumta na ka liang jong ki bor pynïaid district jong ka West Khasi Hills ha ka Sngi Ba-ar ki la shah biang ban pynlong ïa ka jingïakob khwai dohkha, kaba dei pat ban ïaid ryngkat ki kyndon kiba la buh.
Ban bud ryntih ïa ka hukum kaba la pynmih da ka Sorkar Meghalaya lyngba ka shiti No.DCA.33/2012/520 dt.19.09.2023 bad ban pyndam noh ïa ka hukum jong kane ka ophis kaba la pynmih ha shuwa kata lyngba ka shiti No.NDG.3 13/2022/3 12, dt. 19.09,2023, da ka jingthmu ban ïada ïa ka suk ka saiñ jong u paidbah, ka long kaba donkam ban pynmih da kawei pat ka hukum kaba don ïa ki kyndon kaba ïadei bad ka jingai jingbit ban pynlong ïa ki “Jingïakob Khwai Dohkha” kiba hap hapoh ka jingkhmih jong ki bor synshar distrik ka West Khasi Hills District.
Ha ka kyrwoh khubor ba la phah la ong ba kino kino ki riewshimet/ ki kynhun/ ki seng/ bad kiwei kiwei ki dei ban bud ryntih bad kohnguh ïa ki jingbthah kiba la kdew, kata tang u Deputy Commissioner, West Khasi Hills District, Nongstoiñ uba don ka bor bad uba lah ban ai jingbit na ka bynta ban pynlong ïa kino kino ki ‘Jingïakob Khwai Dohkha’ kiba hap hapoh West Khasi Hills District.
Nalor kane, la ong kino kino ki riewshimet, ki kynhun, ki seng bad kiwei kiwei kiba kwah ban pynlong ïa ki jingïakob khwai dohkha ki dei ban pyndap pura ïa ki aplikeshon phom ryngkat bad ki kot donkam ban pynshisha ïa kita ki jingkyrpad jong ki.
Ka ‘Clearance Certificate’ na u Superintendent of Police, West Khasi Hills District kaba don ïa ki jingthoh kum ka tarik bad ka por ban pynlong ïa ka jingïakob, ka jingheh jingrit jong ka pung ka dei ban don ka jaka pynïeng kali kaba biang ryngkat bad ki volunteer kiba ïoh jinghikai, ka rukom pynïaid kali kaba janai bad ban nym don kano-kano ka huri-hura ha ka por ba pynlong ïa ka jingïakob khwai dohkha.
Ka NOC na u Superintendent of Taxes, West Khasi Hills District, Nongstoiñ katkum ka shithi No. ST/WKH/NG-207/2023-24/193 dt.1/09/2023 kaba la pynmih da u Commissioner of Taxes, Sorkar Meghalaya.
Ka NOC na u SE/EE PWD (Roads) West Khasi Hills District, lada kata ka jaka ban pynlong ïa ka jingïakob khwai dohkha (Pung/Nan/Wah) ka jngai kumba 500 metre na ki surok-bah (Highway) lane surok PWD.
Ka NOC na u Sordar Shnong ne Rangbah Shnong, ka NOC na u/ka trai pung lada dei ka pung shimet, ka NOC na ki bor ba dei khmih lada jia ba dei ka pung lane nan paidbah, ka NOC u Sordar Shnong ne Rangbah Shnong bad na ka KHADC lada jia ba ka dei ka wah paidbah, ka NOC na u Superintendent of Fisheries, West Khasi Hills District, Nongstoiñ, ka NOC na u SE/EE PHE & DSBM West Khasi Hills District na ka bynta ki jaka leit bar kum ka Solid/Plastic waste bad Bio-Toilet.
Ki nongpynlong ïa ki jingïakob khwai dohkha, la ki dei ki riewshimet, ki kynhun, ki seng bad kiwei kiwei ki dei ban pynthikna ba ki dei ban bret bha ïa ki jaboh kiba mih na ki plastik, ki jaka leit pynjhieh bad jaka leit bar kiba paka, ban khang pyrshah ïa ka jingdie kyiad bad khalai ha ka jaka ba pynlong ïa ka jingïakob khwai dohkha bad ban pynbiang ruh ïa ki dawai dashin ïoh don kiba kem pang.
Ïa ki aplikeshon phom kiba la biang pura, dei ban leit thep ym duna ïa ka 7 sngi shuwa ban pynlong ïa ki jingïakob khwai dohkha. Ki phom kiba don jingbakla bad kiba thep duna ïa ka 7 sngi shuwa ban pynlong ïa ka jingïakob khwai dohkha kin shah kyntait noh.
Kine ki kyndon kiba thymmai kin treikam noh kumne tat haduh ban pynmih da kawei pat ka hukum.
