Nongstoiñ, Risaw 11
Ar ngut ki briew ki la shah rai pynrem da kaba kin shah set patok ha ka ïingbishar jong ka Special Judge (POCSO) Nongstoiñ, hadien ba la pynshong nongrim bad bishar bniah namar ka jingdonkti ha ki kam thombor.
Ha ka kyrwoh khubor ba la phah, la ong ba ha ka 29-09-2023, ka ïingbishar jong ka Special Judge (POCSO), Nongstoiñ, da kaba pynshong nongrim bad bishar bniah na ki sakhi satar ba la lap na ka jingtohkit, ka la rai pynrem ïa u Himborlin Puwein, da kaba phah set patok haduh 20 snem kynthih ryngkat ka kuna T.50,000 na ka bynta ka kam runar kaba u la leh kaba hap hapoh ka kyndon 6 jong ka POCSO Act, bad na ka bynta katei ka kam la pynngat ruh ha ka kyndon 506 Part-II IPC bad ka jingset patok kaba shi snem kynthih ha ryngkat ka kuna T.1,000 la pynngat lang bad baroh ar tylli ki jingshah pynshitom hap ban mad.
Shuh shuh ha kane ka bynta, u Superintendent of Police ka West Khasi District u la pyntip ba la ïoh pdiang ïa kawei ka ejahar (FIR) ha kaba kawei ka khynnah kynthei ba dang rit ka rta ka la shah thombor. Ïa kane ka kam la leh da u Himborlin Puwein.
Ka kyrwoh khubor la ïathuh ruh ba la pynrung case pyrshah ïa utei u runar hapoh Nongstoiñ PS Case No:- 102(10)2017 u/s 342/506 R/w 5(1)(n)/6 hapoh ka jingtohkit jong ka WPSI F.K Marak jong ka Nongstoiñ Women Police Station bad ïa kane ka case la charge-sheet da ka Investigating Officer hapoh ka kyndon 506 IPC R/w 5(j) (ii)(l)(n) POCSO Act.
Sa kawei pat ka khubor, u Superintendent of Police ka West Khasi Hills District u la pyntip ba la ïoh pdiang ïa kawei ka ejahar (FIR) ha kaba kawei ka khynnah kynthei ba dang rit ka rta ka la shah thombor bad ïa kane ka kam la leh da u Rishan Marweiñ.
Shuh shuh la ong ruh ba la pynrung case pyrshah ïa utei runar hapoh Nongstoiñ PS Case No:-72(10)2020 u/s 5(l)(n)/6 POCSO Act hapoh ka jingtohkit jong ka WPSI N Wanniang jong ka Nongstoiñ Women Police Station bad ïa kane ka case la charge-sheet da ka Investigating Officer hapoh ka kyndon 5(l)(n)/6 POCSO Act. Kumta, ha ka 22-09-2023, ka ïingbishar jong ka Special Judge (POCSO), Nongstoiñ, da kaba pynshong nongrim bad bishar bniah na ki sakhi satar ba la lap na ka jingtohkit, la rai pynrem ïa u Rishan Marweiñ da kaba set patok haduh 20 snem kynthih ryngkat ka kuna T.30,000 na ka bynta katei ka kam runar kaba u la leh kaba hap hapoh ka kyndon 6 jong ka POCSO Act.
