Shillong, Risaw 11
Ka tnad Jngoh Kai Pyrthei jong ka Sorkar Jylla bad ka Khasi Hills Autonomous District Council (KHADC) ka la sdang ban pynkhreh shaid-shaid ban maramot ïa ki ïing trep jong ki Hima Khasi kiba la shna kyrpang ha Khasi Heritage Village kaba don ha Mawphlang, East Khasi Hills District.
Haba U Nongsaiñ Hima u la sdang buddien ïa kane ka jingpynkhreh ïa ka Monolith Festival ha Mawphlang la ïoh ban leit jngoh ïa ka Khasi Heritage Village kaba ka tnad jngoh kai pyrthei ka la bei tyngka ban pynlut ïa kane ka tamasa ka la sdang ban phah ker bad siang da ki siej ïa ki ïing trep jong ki Hima Khasi kiba la jot naduh ba shna haba pynlong khatduh ïa kane ka tamasa ha u snem 2016.
Ïa kane ka jingmaramot la sdang naduh ka 9 tarik mynta u bnai ban shna ïa katto katne ki ïing trep jong ki hima kiba la jot namar la shna ïa kine mynta la bun bun snem.
La ïohi ba ki nongtrei kiba maramot ki la weng noh ïa ki tynriew kiba tap najrong bad la siang da ki siej bad ker ruh da ki siej khnang ban pyni ïa ka jinglong tynrai u Khasi haba ki shna ïing ha ki por mynshuwa.
Haba ïakren bad ki nongtrei ki la ïathuh ba ïa kine ki siej la wanrah na Mawngap bad la pyndonkam beit tang da ki siej ban ker bad siang.
Ki la ïathuh ba ki dieng kiba kyrshan ïa ka iing ki dang skhem hynrei tang ki siej kiba siang bad kiba ker ki la sniew lut.
Ki la ïathuh ba kane ka jingmaramot kin pyndep la kumno kumno hapoh mynta u bnai.
Shuh shuh ki la ïathuh ba ki don katto katne tylli ki ïing trep jong ki Hima Khasi kiba la dep shna ha kine ki snem ba la long khatduh ïa ka Monolith Festival ki dang long haduh mynta.
Katba kiba peit ïa ka Khasi Heritage Village ki la pyntip ba ka tnad shangkai pyrthei kan sa ker da ki siej najrong ka kynroh, nangta kan pynbha biang ïa kito ki paiñkhana kiba la sniew bad kan ot noh ïa ki phlang kiba la heh.
Kumban shu pynkynmaw ka KHADC ryngkat ka tnad shangkai pyrthei ka sorkar jylla ki pynkhreh ban pynlong ïa ka Monolith Festival ha u bnai Nohprah 2023.
Kane ka tamasa ka long ban pyni nam ïa ki bam tynrai, ki riam tynrai, ka shad tynrai bad kiwei de ki jingpyni nam tynrai hakhmat ki nongjngohkai pyrthei.
