Shillong, Risaw:
U MDC barim ka Mawhati, Bah James Sylliang u la rai ban ïakhun biang ïa ka ilekshon MDC ha u snem 2024.
Haba ïakren bad u Bah Sylliang ha kine ki sngi u la pynpaw ba u dang pynkhreh ban ïakhun kum u kyrtong shimet ne u lah ban pan tiket na ka NPP, ka seng kaba bat ïa ka bor synshar hapoh ka KHADC bad hapoh ka sorkar jylla.
U Bah Sylliang u la ong ba u hap ban pan jingmut ruh na ki nongkyrshan shwa ban shim ïa ka rai kaba khatduh.
Nalor kane, u la pyntip ba ha kine ki san snem ba u rem ïa ka ilekshon u khlem jah hynrei u trei beit ïa la ka jong ka kam ban shakri ïa ki paidbah hapoh ka konstitwensi.
Kum ban shu pynkynmaw, u Bah Sylliang u la jop ïa ka ilekshon MDC ha u 2014, hynrei u la rem noh ha u 2019 bad mynta u la pynkhreh ban ïakhun biang ïa ka ilekshon.
Haba pyrshang ban twad jingmut na ki nongkitkam ka NPP ki la ïathuh ba haduh mynta ym pat don ba mih shakhmat ban pan tiket MDC na ka seng NPP ha Mawhati hadien ba u kyrtong ka NPP u la shah rem noh ha ka ilekshon MLA ba dang shu dep.
