Shillong, Risaw 11
Ka tnad pule Education jong ka NEHU, Shillong ha ryngkat ka Career & Counselling Cell, NEHU, Shillong ha ka Sngi Ba-ar ka la pynlong ïa ka ‘Invited Talk Programme’ halor ka jingpyntreikam ïa ka NEP-2020 ha ki shlem ai jinghikai ba shajrong na u Prof. (Dr.) Anisur Rahman, Direc-tor, UGC-Human Resource Development Center, Jamia Millia Islamia, New Delhi ha NEHU Shillong Campus.
Ïa ki kyntien pdiang burom la ïoh na u Prof. B.B. Kharbirymbai, khlieh ka tnad pule Education, NEHU Shillong bad Coordinator ka Career & Counselling Cell, NEHU, Shillong.
Ha kane ka sngi, la ïadonlang ruh u Vice Chancellor, Prof. P.S. Shukla uba la ai ïa ka jingkren sdang.
U la kren halor ka jingpyntreikam ïa ka NEP-2020 bad ki sienjam jong ka haba ïadei bad ka roi ka par ha baroh ki liang. U VC u la pynshai ruh sha baroh shaphang ka lawei jong ka NEP-2020 da kaba pynlong ïa ka pule-puthi kaba kylluid, kaba wanrah ïa ki buit thymmai, ki sap ki phong bad ban ïaleh pyrshah ïa ki jingtynjuh.
U Prof. Anisur Rahman u la ai ka jingbatai bniah halor ka NEP-2020 bad ban jur halor ki 5 tylli ki rishot jong ka – ka jingplie lad, ka jingbym noh shiliang, ka jingpaka, kaba biang dor bad ka jingkitkhlieh.
Kane ka mat treikam ka dei u mawmer uba kongsan ban wanrah jingkylla ha ka jinglong-jingman ka pule-puthi hapoh India. Ha kajuh ka por, ka thmu na bynta ka pule-puthi kaba paka ïa baroh, ban kyntiew ïa ki kor teknoliji bad ki buit thymmai.
Ka jingpule ba shajrong ha ka Jylla ka dei ban kynthup lang ïa ki bynta bapher-bapher jong ka pule-puthi – ban pynlong ïa ka pule-puthi kaba kylluid khnang ban ïa ryngkat bad kiwei-kiwei ki shlem ai jinghikai.
Na bynta ban pyntreikam ïa ka NEP, khlem pep, ki jingtynjuh ki don beit. Hynrei dei ban pynwan ïa ka sha ka bynta jong ka jingmanbha khnang ban pynlong ïa ka pule-puthi ka jingmyntoi na bynta kiba bun balang, ha kawei ka liang ka ban pynmyntoi shi kat dei ïa ka ri.
U la kren ruh halor ka kyrdan jong ki skulbah, ka pule-puthi kaba paka, ka thong ka GER hapoh 2035, ban kyntiew ïa ka jingïarap pisa na bynta ka pule-puthi, ‘digital learning’, nalor kiwei-kiwei.
Ka shlem ai jinghikai ha kiba bun ki liang ne ka ‘Multidisciplinary Institution’ ka long ka jingtynjuh kaba khraw na bynta ka shlem kaba shaniah halade khlem ka jingïasoh bad kano-kano ka skulbah. Shuh shuh ka long kaba donkam ba ki ‘riewshemphang kiba paw kin ai jinghikai ïa baroh ki nonghikai ban weng ïa ki jingeh, ha kajuh ka por ban pynlong ïa ka NEP-2020 kaba jop.
