Shillong, Risaw 11
Ka KSU East Jaiñtia Hills District Unit ha ka Sngi Ba-ar jong ka taïew ka la buh da ka jingthoh sha u ADC ban tip haduh katno la ïaid ka jingtrei halor ka surokbah NH-6. Ha ka jingïakynduh bad u ADC halor ka surok ban pan ka jingtip, ka seng ka la pynpaw ba ka NHAI kam i lah shuh ban shim bad ka sorkar ka dei ban phai khmat noh sha ka NHIDCL ban maramot bad pynbha ïa kane ka surok.
Katkum ka jingthoh ba la ai, ka seng ka la pyntip ba ka jingslem ban maramot ïa kane ka surok ka long ba ka NHAI ka khot ‘tender’ tang ban maramot ym ban shna pynbha shuh shuh bad la pyntip ruh ba ha ka jingkhot ‘tender’ ar sien la don tang uwei u briew ba ïakhun ban ïoh.
Ka seng ka la pynkynmaw bad tip shai ruh ba ka jingslem ka long ba bun na ki liang ki heh ophisar jong ka NHAI ki la shah thep patok namar ba don ka jingkynnoh leh thok bad bamsap.
Shuh shuh ka seng ka la ong ba na ka liang u Myntri Rangbah ka jylla u la khot ïakren bad ki nongmihkhmat ka NHAI bad ruh ka la don ka jingjurip bad ki nongmihkhmat ka thaiñ East Jaiñtia ha ki sngi ba la lah leit hynrei haduh mynta ym pat paw satia ki dak ki shin ban don ka jingmaramot ïa ka surok.
Namar kata, ka seng ka kwah ban kren shai ba lada long ha kano kano ka dur ruh, ka seng ka kwah ban ïoh ïa ka surok ba bha. Ka seng bad u paidbah kim tip ïa kita ki jingeh ba don hapoh hynrei ka sorkar ka dei ban sdang ban wad ki lad ki lynti mar mar khamtam ha kane ka por ba dang ailad ka bneng ban trei.
Ha kaba kut ka seng ka la ong, pyntrei kloi ïa kane ka surok ïoh yn klang ka ding jong ka jingïakhih. Kumta ka seng ka kyrmen ïa kaba bha bad khmih lynti ba ka sorkar kan peit mat noh.
