Shillong, Risaw:
Ki shipai Border Security Force (BSF) ka 193 Bn, ki la ïoh ban kurup ïa ki mar ba shongdor haduh T.11 lak ba kynthup ki jingtah khmat bad ki juti kiba la thmu ban khaïi tuh sha Bangladesh na khappud ka East Khasi Hills District.
Ïa kine ki mar la ïoh kurup ha ka por ba ki nongkhaïi ki dang thmu ban hiar sha khappud ban khaïi tuh ïa kine ki mar sha Bangladesh. Hynrei haba ïohi ïa ki BSF, kine ki nongkhaïi ki la phet krad da kaba shim kabu ïa ka jingdum bad jingslap bad ban ieh noh shadien ïa kine ki mar.
Ïa kine ki mar ba la ïoh kurup na ka liang ki shipai BSF ki la aiti noh sha ki nongtrei Custom ha Dangar ba kin leh ïa kaba donkam.
