Shillong, Risaw 11
Kumba hynriew tylli ki ‘coach’ jong kawei ka rel jong ka North East Express, kaba wan na Delhi ban leit sha Assam, ki la kylla noh ha Bihar ha ka miet jong ka Sngi Balang.
Katkum ka khubor ba la pynmih da ka NDTV la ong ba kitei ki ‘coach’ jong katei ka rel ki la kylla ha ka jaka kaba don hajan ka Raghunathpur Station hajan Buxar ha ka por kumba 9:35 mynmiet.
La ong ba kane ka rel ka la sdang ban ïaid na Anand Vihar Terminus ha Delhi ban leit sha Kamakhya hajan Guwahati, Assam.
Kane ka lad pathai khubor ka la pynbna ruh ba saw ngut ki briew ki la duh noh ïa la ka jingim ha kane ka jingkylla jong kitei ki ‘coach’ jong katei ka rel.
U Myntri ka tnat Rel ka Sorkar India, u Ashwini Vaishnaw, u la pyntip lyngba ka rynsan ‘X’ ba ka jingai jingïarap ïa kito ki lanot kiba la don ha katei ka rel ka dang ïaid. U la ong ba ka NDRF, SDRF, bor distrik, bor jong ka tnat rel lem bad ki nongshong shnong ki la pynlong ïa ka jingwad bad ban sei ïa ki briew na katei ka rel. Ïa kiba mynsaw, u la ong ba la pynkit noh sha ki hospital kiba don marjan. Na ka liang ka shlem treikam u Myntri Rangbah ka Assam, u Himanta Biswa Sarma, ka la pyntip ba ka sorkar Assam ka dang peitngor bha halor katei ka jingkylla ka rel ha Bihar. La ong ruh ba ka la don ka jingïakren bad ki bor distrik ha Buxar lem bad kiwei pat ki shnat treikam ka sorkar.
Ki nombor ba ki briew ki lah ban pan jingtip halor katei ka jingjia: Patna: 9771449971, Danapur: 8905697493, Commercial Control: 7759070004, Ara: 8306182542, New Delhi -01123341074, 9717631960, Anand Vihar Terminal – 9717632791, Commercial Control Delhi Division – 9717633779.
