Shillong, Risaw 11
Ka jingïoh ban khaïi be-aiñ sha ki thaiñ khappud ka la long kaba na ka por sha ka por ha kaba ha kane ka kynti kaba mynta ruh ki shipai BSF Meghalaya jong ka 181 Battalion kiba ap pahara ha khappud ki la ïoh ban pyllait im haduh 70 tylli ki masi na khappud kiba la thmu ban khaïi be-aiñ shapoh ka Ri Bangladesh.
Na ka liang ki shipai BSF hadien ba ki la ïoh ïa ka jingtip kaba bniah halor kane ka jingdon ka jingkhaïi beaiñ, mar mar ki la ai jingtip ïa kane sha ki pulit jong ka Meghalaya Police ban ap ktem ha khappud jong ka shnong Silbari, South Garo Hills bad ha kane ka jingap ki la ïoh ban kurup haduh 22 tylli ki muid.
Ïa kine ki muid kiba la ïoh ban kurup bad bat la aiti noh sha ki pulit ban leh ïa kaba donkam katkum ki kyndon jong ka aiñ.
Ha kawei pat ka jingkhynra, ki shipai BSF jong ka 193 Battalion bad 172 Battalion ki la ïoh kurup haduh 48 tylli ki masi kiba la thmu ban khaii be-aiñ sha ka ri Bangladesh lyngba ka khappud jong ka East Khasi bad ka East Jaiñtia Hills.
