Jowai, Risaw 11
Da ki spah ngut ki paidbah naduh ki khyllung khynnah haduh kiba la san ki la ïoh jingmyntoi lyngba ka ‘Free Mega Health Camp’ ba la khot pynlong da ka North East Adventist Univer-sity, Khliehtyrshi, Thad-laskeiñ West Jaiñtia Hills District ha ka Sngi Ba-ar ha ryngkat ka jingïatreilang bad ki tnat sorkar bapher bapher.
Kane kan dei ka sien kaba nyngkong ba la pynlong ïa kaba kum kane ka jingai jingsumar kaba heh tam bad ka jingleh ïa kiba bun tylli ki test kaba sted tam halor ki jait jingpang bapher bapher da kaba pyndonkam ïa ka RT-PCR technology bad ïarap ruh ban pynïoh ïa ka jingsumar lyngba ki prokram jong sorkar.
Ha ka jingïalang plie ïa kane ka prokram la ïoh ka jingkren na ka Kong DV Lyngdoh, Additional Deputy Commissioner West Jaiñtia Hills District, Dr Helen J Uriah, District Maternal and Child Health Officer, Health Department, WJH; Dr Brightstar Langbang, Block Development Officer, Thadlaskeiñ; Shiva Sriram, Vice President ka Molbio Diagnostics; bad Dr. Darivianca E Laloo, General Manager ka Molbio Diagnostics.
Ka Dr. Helen, ka la ong ba “Ka Thadlaskeiñ block ka dei ka thaiñ kaba ki duna shibun ha kaba ïadei bad ki kam ai jingshakri ha ka liang ka koit ka khiah khamtam na ka bynta kito ki nongshong shnong kiba shong sha ki thaiñ kiba kham pajih. Kane ka block ka dei ruh kaba duna tam halor ka jingdon jong kiba ai ïa ki tika injek, ha kaba kiba bun na ki khynnah kiba ha ka rta 2-5 snem kim pat shym la ïoh ïa ka jingai tika injek halor u ‘ñiangpyrsit ne measles Rubella vaccine na ka bynta shisien ne arsien.”
“Lah ban kdew ba baroh kito ki briew kiba la pynkhreh da ka ophis Block Development bad ki self-help group ki la ïohlad ha kaba ïadei bad ki lad jingsumar lyngba kane ka health camp,” ong ka Dr Helen J Uriah, Maternal and Child Health Officer, WJHD.
