Shillong, Risaw:
U Chairman-cum-Managing Director jong ka MeECL u Sanjay Goyal u la pyntip ba na ka liang jong ka sorkar jylla man la ka por ka ju pynlong ka jingpeit bniah ban sngewthuh halor ka jinglong shngaiñ jong ka dam Umïam lyngba ka jingïarap jong ka IIT Guwahati.
Haba kren bad ki lad pathai khubor ha ka Sngi Ba-ar halor ka jinglong shngaiñ jong ka dam Umïam, khamtam hadien jong ka jingtwa ka dam ha Sikkim, u Sanjay Goyal u la ong ba ka tnat Bording ka don ka jingsngewkhia shibun eh halor ka jinglong shngaiñ jong ka dam, bad lyngba ka jingïarap jong ki agency kiba ju pynlong ka jingjurip bad peit bniah man la ka por ha kaba ïadei bad ka jinglong jingman jong ka dam.
“Ka IIT Guwahati ka dei kawei na ki agency kaba hakhmat eh kaba la trei shitom ha kaba ïadei bad kane ka bynta. Ki la pynlong ïa ka jingpeit bniah halor ka jinglong shngaiñ na ka bynta ka Sorkar Jylla ha ki por ba la leit bad dang shen ruh ki la leh ïa ki katto katne ki tes na ka bynta kane ka jingkieng,” la ong u Goyal.
U la ong ba ka jingkieng ha dam Umïam ka don ar tylli ki jingtei (two structures), kawei ka dei ka super structure ba ïadei bad ka jingkieng, ha kaba ka la don ka jingpyntrei ha kaba bujli ïa ki ‘ball bearings’, bad kawei pat ka sub-structure ha kaba la ju pynlong ïa ka jingpule ne wad bniah bad kumba ka long mynta, kam pat don jingma satia ïa kane ka jingkieng.
“Hynrei wat la katta, hapoh ka Dam Rehabilitation Programme, ngi dang pyrshang ban wanrah sa kawei ka agency ka ban pule bad wad bniah ïa baroh ki jingtip ba ïadei bad ka sub-structure jong ka dam, kata halor ka jinglong shngaiñ, ka jingjaw um bad kiwei ki bynta,” u la ong.
Shuh shuh u la ban ba kumba ka long mynta, katkum ki kaiphod ba la ïoh ki la kdew ba ka dam ka dang biang pura bad ka dang bud ryntih ïa ki kyndon jong ka jingshngaiñ kiba la buh.
