Nongpoh, Risaw 11
Haba shim khia halor ka jingwan bret jaboh pathar da ki briew kiba ïaid lyngba ka surok bah National Highway 6, ka seng Ri Bhoi Youth Federation (RBYF) Lumnongrim Unit ha ka sngi Balang ka la phah tam biang ïa ki jaboh kiba la wan bret hajan ka Wah Umpih ha Umsning Bypass da kawei ka trok.
Kumba la ïoh jingtip, la ïathuh ba ka trok kaba don ïa u nombor AS01-NC-7796 hadien ba ka la dep ban wan pynhap ïa ki tiar jong ka College of Agriculture ha Kyrdemkulai, ka la leit ban bret pat ïa ki jaboh kiba tam harud ka wah Umpih ha kane ka sngi.
Na ka liang ki dkhot ka RBYF hadien ba ki la ïoh jingtip halor katei ka jingleh khlemakor da u nongñiah bad nongbud jong katei ka trok, ki la leit wut-wut sha katei ka jaka ban bat ïa kitei ki briew kiba wan bret jaboh ha katei ka jaka bad phah ïa ki ban tam biang ïa baroh ki jaboh kiba ki la bret.
Ha kajuh ka por, ka seng ka la buh ruh ïa ka jingmaham ïa ki nongleit nongwan lyngba katei ka surok bah kiba ju mlien ban bret jaboh pathar ba ki dei ban nym mlien shuh nangne shakhmat. Lada jia ka seng ka dang lap ha kine ki sngi ban wan kan leh da kaba tyngeh ban ai jingsneng.
