Nongpoh, Risaw 11
Ka Central Bureau of Communication (CBC) jong ka tnat Information and Broadcasting ka Sorkar Kmie ha ka sngi Balang ka la sdang ïa ka prokram kaba lai sngi lynter ban pynshai paidbah halor ka thong jong ka sorkar kmie ban wanrah ïa ka khuid ka suba bad ban ai jinghikai halor ki jait jingbam kiba tei ïa ka met lyngba ka phang pdeng Swachh Bharat & Poshan Abhiyan kaba la pynlong ha Alpha English Higher Secondary School, Nongpoh.
Ïa kane ka prokram la wan ban plie da u Manish Kumar Singh, Assistant Commissioner ka Ri Bhoi District ha ka jingdon ryngkat ka Jane Namchu, Additional Director General ka Zonal Central Bureau of Communication, ka Kong D Shylla Nutritionist jong ka DPO Ri Bhoi, ka Kong WK Blah Principal jong ka Alpha English Higher Secondary School, u Bah Biangbok Basaïawmoit na Umling C&RD Block, ki khynnah skul lem bad kiwei kiwei ki ‘riew pawkhmat.
Na ka liang ki nongkren ha kane ka sngi ba kynthup ïa u Manish Kumar Singh, ka Jane Namchu bad ka Kong D Shylla, ki la batai sha ki paidbah halor ka jingdonkam ban leh khuid leh suba ym tang ha ki kyrpong ïing, hynrei ha ki rud ki kiar bad ki shnong ki thaw ruh kumjuh kaba dei ruh ka jingangnud jong ka sorkar kmie kaba la pyntrei lyngba ka Swachh Bharat Mission. Nangta ki la ai jingkren ruh halor ka jingdonkam ban bam ïa ki jingbam kiba tei ban ïoh ïa ka met kaba shait ba khlaiñ lyngba ka skhim Poshan Abhiyan kaba la mang kyrpang da ka sorkar kmie na ka bynta ki hep barit bad ki longkmie ruh kumjuh.
Kum shi bynta na kane ka prokram, ka tnat Central Bureau of Communication, ka la pynlong ruh ïa ka jingpyninam ïa ki dur jong ki nongïaleh laitluid jong ka thaiñ shatei lam-mihngi, ki jingïakob bapher bapher ba kynthup ïa ka jingïakob shad, ka jingïakob dro, ka jingïakob kyntip ktien bad kiwei kiwei kiba ïadei bad ka mat jong ka khuid ka suba.
Ha kajuh ka por na ka liang ka Central Bureau of Communication, ka la pynkup burom kyrpang ruh ïa uwei na ki nonghikai jong ka Alpha English Higher Secondary School, u Madhav Singh, uba la ïoh pdiang ïa ka khusnam Teachers National Award na ka President jong ka ri ka Droupadi Murmu ha ka sngi rakhe kyrpang ïa ka sngi ki nonghikai kaba la long ha ka 5 tarik mynshem bnai.
