Shillong, Risaw 11
Kum shi bynta ka jingrakhe ïa ka jingïaid lynti kaba 50 snem kynthih jong ka shlem treikam ka Meghalaya Board of School Education (MBoSE) kaba dei ka shlem treikam kaba peit bad khmih ïa ka pule puthi bad kaba ju pynïaid ïa ki eksamin hapoh kane ka jylla, ka la pynlong da ka rynsan ïakob rwai Choir lane ka Inter School Choir Competition ha ka 11 tarik u bnai Risaw 2023.
Ha katei ka jingïakob rwai, ka skul Synod Higher Secondary School, Shillong ka la ïoh ban rah ïa ka nam lahduh bad ka la ïoh ban khur ïa ka song pisa kaba T. 30,000. Ka St. Mary’s Higher Secondary School, Shillong ka la wan ha ka kyrdan ba ar bad ka la ïoh ban khur ïa ka song pisa kaba T. 20,000 bad ka Kiddies Corner Higher Secondary School, Shillong kaba la wan ha ka kyrdan ba lai ka la ïoh khur ïa ka song pisa kaba T. 15,000.
Ïa kane ka jingïakob rwai la buh ruh ïa ka phang, “Celebrate the past, Embrace the present and Rise to the Future” la pynlong ha U Soso Tham Auditorium, Shillong, ba la wan ïashim bynta da 8 tylli ki skul na East Khasi Hills district bad ki nongbishar ha kane ka jingïakob rwai ki long u Bah B. Latam, ka Kong P. Warjri bad u Bah W. Nongsiej.
Ïa ki khusnam sha ki nongjop la sam da u Executive Chairman jong ka MBoSE, u C.P Marak uba la long kum u kongsan ha kane ka sngi, ha ryngkat ka jingsakhi lang u Joint Director ka MBOSE, Regional Office, Shillong u Bah Macdonald Marbaniang, ki nonghikai na ki skul bapher bapher, ki kmie ki kpa bad ki khynnah skul.
Ka Synod Higher Secondary School kaba long ka kynhun lahduh ha kane ka rynsan ïakob ka la shah jied ban leit rwai ha ka 19 tarik mynta u bnai ha nongbah Tura, West Garo Hills District ha ka sngi pynhap pyrda ïa ka jingrakhe dap 50 snem jong ka MBoSE.
