Jowai, Risaw 11
Ka Halfway Home kaba don ha Sabah Muswang ba la pynïaid da ka Society for Urban and Rural Empowerment (SURE), Jowai hynnin ka sngi ka la rakhe ïa ka World Mental Health Day halor ka phang “Mental Health is a Universal human right”.
Ïa ka jingïalang la pynïaid da ka Niwanka Shylla Project Coordinator Halfway Home Sabah Muswang bad ki kyntien plie phang la pashat da u Dr. H.H. Mohrmen Secretary SURE uba la ai ruh ka jingïaroh ïa ka Dr. Anne Paswet Psychiatrist kaba dei ka Medical Superintendent Jowai Civil Hospital bad Dr. Ebormitre Dann kiba la don bynta ban wan jurip man la ka por ïa ka Halfway Home kumjuh ia u Dr. Dann uba la ai ïa ka T.V na ka bynta ban pyndonkam ha katei ka ïing.
Ka Halfway Home ka dei ka jaka ba peit bad sumar kyrpang khamtam ïa kito kiba dang wan na ki jaka sumar ha ka liang ka bor jingmut jingpyrkhat. Da ka jingdon jong kane ka jaka kin ïoh shibun ki lad jingïarap naduh ki jingïasyllok, jinghikai Vocational training, ka ithuh ïa ki jaka sah nalor kiwei de.
Ha kane ka sngi ka la don ka jingïakob dro dur ba la pynlong na bynta kiba dang don hapoh ka Halfway Home bad la sam khusnam ruh sha ki nongjop.
