New Delhi, Risaw 11
Ka India ha ka Sngi Balang ka la sdang da ka ‘Operation Ajay’ ban leit shaw ïa ki nongshong shnong na Israel hadien ba ka thma ka la sdang pyrshah ïa ka kynhun Hamas na Gaza Strip naduh ka Sngi Saitjaiñ. Ki don kumba 18,000 ngut ki nong India kiba don ha Israel.
“Ngi la pynkhreh ïa ki liengsuiñ bad kiwei ki jingdonkam. Ngi kwah ban pyntip ba ngi long kiba la kloi ban ai jingïarap ïa ki nongshong shnong kiba don shabar ri,” la ong u Myntri ka tnat Bar Ri, u S Jaishankar, ha ka rynsan X.
Ka kynhun banyngkong ki nong India kiba la dep ban pynrung kyrteng ba ki kwah ban wanphai noh sha la Ri kan mih lashai, la pyntip ka Embassy jong ka Sorkar India ha Israel.
“Ka Embassy ka la dep ban phah jingtip sha kito ki nongshong shnong ka Ri kiba la dep ban pynrung kyrteng bad ka liengsuiñ banyngkong kan mih lashai ka sngi. Na ka bynta kiwei pat, yn sa nang ai jingtip ha ki sngi ban wan,” la ka Embassy.
Ha kawei pat ka liang, mynta ka sngi ka sorkar Israel ka la thaw da kata ka ‘Emergency Government’ da ka jingïatreilang bad ka kynhun Liang Pyrshah kum shi bynta ban pynkhlaiñ ïa ka jingïakhun pyrshah ïa ka kynhun pyntriem Hamas.
Hadien ba ka kynhun Hamas ka la thombor ïa ki nongshong shnong ka Israel ha ka Sngi Saitjaiñ da kaba pynïap ïa ki briew ha ki ïing ki sem jong ki bad da kaba ther da ki ‘nam ding, ka Israel ka la khyrwit kylla ïa ka Gaza Strip da kaba bret na suiñ da ki bom. Ka Gaza Strip ka dei ka jaka kaba la synshar da ka Hamas.
Nalor ba ki la pynïap ïa ki briew, ki lehnoh Hamas ki la rahbor ruh ïa ki nongshong shnong ka Israel bad na kiwei pat ki Ri bad la kit ïa ki sha Gaza Strip.
Ym tang ba ka Israel ka hap ban ïakhun pyrshah ïa ka Hamas, hynrei ka la shah ther ruh da ki bom ha ka kynhun lehnoh Hezbollah na ki thaiñ Shatei jong u khappud bad ka Lebanon. Ka Hezbollah ka la pyntip ba ka la ther da ki ‘nam ding ïa ka Israel ha ka Sngi Balang katba ki shipai Israel ki la ïathuh ba ki la ther ïa kawei na ki jaka peitngor kane ka kynhun lehnoh ha ki bynta ba Shathie jong ka Lebanon.
Ha kajuh ka por, ka Israel ka la hap ban ïakhun sa bad ki lehnoh kiba na Syria ha ka Sngi Ba-Ar hadien ba ki shipai ki la pyntip ba ka la don ka jingshah ther ha ki bynta jong ka Golan Heights.
